ەرىكتى ءتىلشى ۋاڭ زىرۇڭ حابارلايدى. ”بۇگىنگى شۇبات ساتىلىپ بولدى، مىناۋ شۇبات ساتۋدان تۇسكەن 1200 يۋان، ساقتاپ قوي“. ەركىنقان مۇقيات كۇندەگى ادەتىنەن جازباي، شۇبات ساتۋدان تۇسكەن اقشانى جۇبايى سايراگۇل قاناعاتقا تاپسىرىپ جاتتى.
ەركىنقان قىستاقتاعى اۋقاتى شالقىپ وتىرعانداردىڭ ءبىرى، الايدا، وسىدان بىرنەشە جىل بۇرىن ولاردىڭ دا تۇرمىس جاعدايلارى ءبىرشاما ناشار ەدى. 2013 -جىلى 4 -ايدا ەركىنقان مەن جۇبايى ەكى ۇلىن الىپ، 3 تۇيەسىن جەتەلەپ، تولى اۋدانى تەمىرتام قالاشىعى قاتۋ قىستاعىنىڭ اقبۇلاق مالشىلىق تۇيىنىنە كەلىپ، تۇيە باعىمشىلىعىمەن اينالىسا باستايدى.
قاتۋ قىستاعى اقبۇلاق مالشىلىق ءتۇيىنى سۋلى، وتتى، شۇيگىن جەر، بۇل اراداعى وسىمدىكتەردىڭ كوبى ءدارى ءشوپ بولعاندىقتان، وسىندا ساۋىلعان تۇيە شۇباتىنىڭ قۇرامىندا دا دارىلىك قاسيەت بار.
ەركىنقان: ”وسىنشاما ءنارلى شۇباتىم ساتىلماي جاتقاندا، قاتتى ابىرجىدىق“ دەدى.
2020 -جىلى 9 - ايدا قالاشىق پارتكومى، ۇكىمەت، قىستاق ”ەكى كوميتەتى“ جانە قىزمەت اترەتى ەركىنقاندى ءتۇيىندى سۇيەمەلدەۋ وبيەكتىسى ەتىپ بەلگىلەپ، ۇيىنە قايتا -قايتا بارىپ جاعداي ۇعىسىپ، ونىڭ ءىس جۇزىندىككە ۇشتاستىرا وتىرىپ جەرگىلىكتى جاعدايعا قاراي تۇيە باعىمشىلىعىن دامىتۋىنا قولداۋ كورسەتۋمەن بىرگە، وعان شاعىن قارىز اقشا الىپ بەردى.
تۇيە باعۋدىڭ قىر-سىرىن ەگجەي -تەگجەيلى مەڭگەرە ءتۇسۋ ءۇشىن، ەركىنقان اۋدانداعى، قالاشىقتاعى مال شارۋاشىلىعى تەحنيكتەرىنەن كىشى پەيىلدىكپەن كەڭەس سۇراپ، تەحنيكتەرمەن ۇنەمى ءۇنحاتتا پىكىر الماستىرىپ، تەحنيكا ۇيرەنىپ، ىندەتتەن ساقتانۋ بىلىمدەرىن سۇراستىرىپ، قيىن ماسەلەلەرىن شەشىپ وتىردى. اقبۇلاق مال شارۋاشىلىق ءتۇيىنى ءبىرشاما شەتكەرىگە ورنالاسقاندىعى سەبەپتى، ەركىنقان قالاشىق، قىستاق ۇيىمداستىرعان باعىمشىلىق تەحنيكاسى كۋرستارىنا قاتىناسا المايتىندىقتان، جاقىن اراداعى قارامايلى قالاسىنىڭ جارانبۇلاق رايونىنداعى كۋرستارعا قاتىناسىپ، قول تەلەفوندا ۇيرەنىپ، باسقا باعىمشىلارمەن ءوزارا اۋىس -كۇيىس جاساپ، ءونىمدى باعىمشىلىق ادىستەرى مەن تاجىريبەلەرىن ءبولىسىپ كەلەدى.
باعىمشىلىقپەن بىرنەشە جىل دەن قويا اينالىسقان ەركىنقان تۇيەسىن باستاپقى 3 تۇيەدەن كوبەيتىپ، 60 نەشە تۇيەگە جەتكىزەدى. بيىل 20 نەشە بوتالى ىنگەننەن كۇنىنە 40 نەشە كيلوگرام شۇبات ساۋىپ، ءار كيلوگرامىن 30 يۋاننان قارامايلىعا وتكىزىپ وتىر. تەك تۇيە باعىمشىلىعىنىڭ وزىنەن كىرەتىن وتباسىنىڭ جىلدىق كىرىسى 300 مىڭ يۋاننان اسادى.
بۇل كۇندە وتباسىلىق كىرىسى ارتىپ، تۇرمىس جاعدايلارى زور دارەجەدە جاقسارعان ەركىنقان قارامايلى قالاسى جارانبۇلاق رايونىنان 80 شارشى مەترگە جۋىق ءبىر ءۇي ساتىپ الىپ، وسى ارادا شۇبات ساتىپ وتىر، ءبىر جاعى ۇلىنىڭ قالادا جۇمىس ىستەۋىنە دە قولايلى. بۇدان سىرت، جەڭىل اۆتوكولىك، پيكا اۆتوكولىگى جانە جۇك اۆتوموبيلىن ساتىپ العان.
ەركىنقان: ”تاپقان تابىسىمدى جالعاستى شارۋاشىلىعىمدى وركەندەتۋگە جۇمساپ، قالاشىق پارتكومى مەن قىستاق ’ەكى كوميتەتىنىڭ‘جانە قىزمەت اترەتىنىڭ قولداۋىندا باعىمشىلىق الاڭىمنىڭ كولەمىن كەڭەيتىپ، باسقا دا باعىمشىلىق وتباسىلارىمەن، مالشىلارمەن سەلبەسىپ، باعىمشىلىق، شۇبات جانە تۇيە ەتىن مانەرلەۋدى، ساتۋدى ءبىر تۇلعالاندىرعان باعىمشىلىق سەلبەستىك كووپەراتيۆىن قۇرىپ، كاسىبىمدى دامىتىپ، قىستاق تۇرعىندارىن وزىممەن بىرگە اۋقاتتاندىرۋ بەكىمىنە كەلدىم“ دەدى.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى