□ ءتىلشىمىز ۋاڭ تيڭ
”كەۋدەلەرىڭدى كوتەرىپ، دەنەلەرىڭدى تىك ۇستاڭدار، جارايدى، ءدال وسىلاي... “ 5 ـ ايدىڭ 8 ـ كۇنى شاۋەشەك قالاسىنداعى جەدي ونەرگە تاربيەلەۋ شەكتى سەرىكتەستىگىنە بارعانىمدا، جاس شاماسى ۇقساماعان 20 نەشە كۋرسانتتىڭ ءبي مۇعالىمى گۇلفيرا مۇقاشتىڭ جەتەكشىلىگىندە ءبي ۇيرەنىپ جاتقانىن كوردىم.
90 ـ جىلداردىڭ تۇلەگى بولعان گۇلفيرا كىشكەنتايىنان ءبي بيلەۋدى ۇناتىپ، مۋزيكا ءۇنى شىقسا بولدى، بيگە باسا جونەلەتىن. ءوز اۋەسىن كاسىپكە اينالدىرۋ وتە باقىتتى ءىس، گۇلفيرا مىنە وسىنداي باقىتتى جاننىڭ ءبىرى.
2003 -جىلى گۇلفيرا شينجياڭ كوركەمونەر شۋەيۋانىنىڭ ءبي ونەرى كاسىبىنە قابىلدانادى.
ءبي جاتتىعۋى جاپالى ما، ارينە، ەرەكشە جاپالى، الايدا، گۇلفيرا العان بەتىنەن قايتۋدى ويلامادى.
داشۋەدەگى كەزىندە گۇلفيرا ءبي ونەرىنە ىسىلا ءتۇسۋ ءۇشىن، ۇنەمى ۇستەمەلەپ جاتتىعاتىن. ۋاقىتى شىعا قالعاندا، مۇعالىمدەرىنەن كەڭەس الىپ وتىردى ءارى ءتۇرلى ءبي نومىرلەرىن كورۋ، كەسكىنگە قاراپ ۇيرەنۋ ارقىلى ءبي ارەكەتتەرىن ۇيرەندى.
“ءبي ۇيرەنۋ، ونەرگە جاتتىعۋ وتە جاپالى، الايدا، ءوزىم قالاعان ءىس بولعان سوڭ ءارى ساحناعا شىعىپ جۇرت الدىندا ونەر كوسەتۋدى ويلاعاندا، ءتىسىمدى تىسىمە باسىپ، شىداي ءتۇستىم” دەدى گۇلفيرا.
وقۋ تاۋىسقاننان كەيىن، گۇلفيرا كوپتەگەن ءبي ۇيرەنۋ ورىندارىنا بارىپ ءبي مۇعالىمى بولدى. 2021 ـ جىلى 1 ـ ايدا ول شاۋەشەك قالاسىنداعى جەدي ونەرگە تاربيەلەۋ شەكتى سەرىكتەستىگىنە قابىلدانىپ، ۇلتتىق ءبي مۇعالىمى بولدى.
گۇلفيرا جاپا -ماشاقاتپەن ۇيرەنىپ، ونەر كورسەتىپ، ءوز ارمانىن ىسكە اسىرۋمەن بىرگە، وقۋشىلار مەن اتا ـ انالاردىڭ دا قولداۋىنا يە بولدى.
”گۇلي مۇعالىم كاسىپتىڭ مامانى، ونىڭ ۇستىنە وتە قاجىرلى، ول ۇيرەنگەندەرىن تۇگەلدەي كوپشىلىككە ۇيرەتكىسى كەلەدى، ونىڭ كوز جانارىنان باۋىرمالدىلىقتىڭ ساۋلەسىن بايقادىم“ دەدى 13 جاستاعى وقۋشى يۋان لىلين. ونىڭ ءبي ۇيرەنگەنىنە 9 جىل بولعان، ۇستازىنىڭ قىزعىندى ءارى ۇمىتكە تولى بەينەسىن كورگەندە ونىڭ تۇلا بويىن كۇش -قۋات كەرنەيدى ەكەن.
”ەڭبەگى باردىڭ، ونبەگى بار“ دەمەكشى، ءبي ونەرىن ۇيرەتكەن 12 جىلدان بەرى گۇلفيرا وقۋشىلارىمەن بىرگە ۇزدىك ناتيجەلەردى قولعا كەلتىردى: تاتار ۇلتىنىڭ ءبيى «ارۋ قىز» اۆتونوميالى رايوندىق ۇزدىك ورىنداۋ سيلىعىنا، تاجىك ۇلتىنىڭ ءبيى «تاۋ قىرانى»، ۇيعۇر ۇلتىنىڭ ءبيى «شىنى ءبيى» 16 -كەزەكتى «مەكتەپ كەرەگى . شاڭحايدا جۇزدەسۋ» تاقىرىبىنداعى بۇكىل مەملەكەتتىك جاستار مەن جاس وسپىرىمدەر توراپ تەلەۆيزور كوركەمونەر جارىسىندا التىن مەدالعا يە بولدى، سونىمەن بىرگە، ءوزى ۇزدىك سەنارياشى جانە رەجيسسەر مۇعالىم بولىپ باعالاندى.
گۇلفيرا ءوزىن ءبي ۇيرەتۋگە ارنادى، كاسىپتەن سىرت وزىنە قالدىراتىن ۋاقىتى ساناۋلى عانا، الايدا، ول باسقالارعا شىن ىقىلاسپەن قامقورلىق جاسادى. ول شاۋەشەك قالالىق مادەنيەت -ساياحات مەكەمەسىنىڭ كوركەمونەر ەرىكتىسى، ول ۇنەمى الەۋمەتتىك يگىلىك قيمىلدارعا قاتىناسادى. كومەكتەسۋ، سۇيەمەلدەۋ قيمىلدارىندا كوركەمونەر ەرىكتىسى سالاۋاتىمەن الەۋمەتتىك يگىلىك قيمىلدارعا قاتىناسىپ، ادەمى بيلەرىن كوپشىلىككە ارنادى.
“ءبيدىڭ تۇرلەرىن ۇزدىكسىز جاڭالاپ، ءبي ساباقتارىن مولايتىپ، ءتىپتى دە كوپ ادامداردىڭ بيگە بولعان اۋەسىن ارتتىرا تۇسەمىن” دەدى گۇلفيرا.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى