تىنىشتىقبەك ابدىكاكىموۆ (قازاقستان)
ءاي، كوڭىل-اي،
ءوشىن جوقتاپ وتكەندەگى وكسىكتىڭ،
داۋرىعادى ەل ەرتە.
كەشەگى كۇن بۇگىن جالعان بوپ شىقتى!
نە بولارىن كور ەرتەڭ...
ۇمىتىڭدى قويدى ماعان باقتىرىپ،
ۇرەيىڭ دە، ازاڭ دا.
دەرت ۇشىندا - جەر مەن اسپان...
تاعدىرىم -
سول كوك الا توزاڭدا...
ماۋسىمدارى تىرلىگىنەن شاتاسقان -
ماڭگۇرتتىككە شىداپ كور!
وبال سۇيگەن ءسوزىڭ ەدىم...
توپاستار
تۇنشىقتىردى قۇلاقپەن!
تۇيتكىلى جوق تۇيسىكتەردى بىقسىتىپ،
ىنجىقتار دا ريزا.
كوزدەر ەدىك كولگىرسۋدىڭ شىقشىتىن،
كوتەرمەيدى قىلي زاڭ...
قاجەتسىز بە جاندى سەنىم، ءماندى ىرىم،
سەن دە، ەندەشە، كوز الدا.
دەرت ۇشىندا جەر مەن اسپان!..
تاعدىرىڭ -
سول كوك الا توزاڭدا!
ءاي، كوڭىل-اي،
ۋىسىندا ۇعىلماستاي قۇلدىقتىڭ،
ۇيات قىلىن ورتەتتىڭ!
ءان جەگىلگەن ارباسىنان سۇمدىقتىڭ،
اڭساتپاشى ەرتەكتى!..
كوكي بەرگەن، كوكىرەگىم، كوزى اققىر،
نەڭ قالدى ەندى ايباردان؟!
بۇل جالعاندا الا الماسپىز ازاتتىق،
اجال مەنەن وي باردا...
* * *
الداپ ءالى كەلە مە كولگىر ءومىر؟..
ايتىپ بەرسەڭ قايتەدى-اۋ سەن ءبىر ەمىن!
كوسموسقا كوزەلەر كوكىرەكپەن،
كوزدەرىڭە ولگەنشە تەلمىرەمىن.
كوكەيىمدە كوكتەگەن بۇرتىكتى ۇعىم،
ءولىمدى دە ويلاتپاس، قۇلدىق تۇگىل.
كىرپىكتەرىڭە دەيىن وتىر ساناپ،
جابايىلاۋ، جارىمەستەۋ ىنتىقتىعىم.
مۇمكىن قازىر قول ىسىپ، ارقا مۇزداپ،
ساناداعى سابىردى سارقامىز دا.
تۇيسىك ءوشىپ زاماتتا ءتىل كۇرمەلىپ،
ايعاي سالار ۇنسىزدىك ورتامىزدا؟!
تامىرىمدا بۇرقانعان-بۇلىك دەر ەم،
تابيعاتىن تانيتىن قۇلىق-كەرەڭ!
جازمىشىمنىڭ جازۋىن
جالعىزدىعىم
جازىپ الدەن قويدى ما؟..
كۇدىكتەنەم.
ماعان، جانىم، سەندەگى كۇلكى-نەسىپ،
قۋلىعىڭدى بىلدىرمەي ىركىلەسىڭ...
سۇقتانعانىن بىرەۋدىڭ بىلگەن سايىن،
سۇلۋلانىپ كەتەتىن سيقىر-وسى!
بۇل سيقىرعا تيىسپەۋگە ءتيىس پەندە،
بۇركەنبەسىن سوزبەن دە، سۇيىسپەن دە.
ءبىر قىزعانىش سورادى جۇرەگىمدى،
كۇدىگىم مەن ءۇمىتىم تۇيىسكەندە.
نە دەسەڭ دە بۇل سەزىم تارقامادى،
قۇپياسىن اشۋعا قورقا ما ءتىل؟..
كۇدىگىمنىڭ قاپ-قارا كۇيىگىنە،
جانارىڭنان جاپ-جارىق جاس تامادى.
* * *
كوپ اعايىن مەنى، اتتەڭ، تۇسىنبەدى،
قىسىم با ەدى بۇل سوندا ءتۇسىم بە ەدى؟..
ولەڭ ءۇشىن ابىگەر بولدى ما ولار؟
ءبارى دە الدە وزدەرى ءۇشىن بە ەدى؟!
كىسىنەسە ءۇمىتتىڭ اقتاڭگەرى،
ول دا جاقسى، دانەڭە جوقتان گورى.
مەيىرىمسىز كوپ اۋىز كوكىپ-اق ءجۇر،
مەنى مۇڭايتقاندارىن ماقتان كورىپ.
قۇشىپ الىپ كوڭىلمەن شار تاراپتى،
بايعۇز ءۇنىن تىلىمنەن سورعالاتتىم.
مەن مۇڭايسام - ىشىمدە جاتار ءبارى:
تاۋ كوگەرىپ...
كول سىزداپ...
قانتالاپ ءتۇن...
ءتۇن ارمانىن، تاۋ كۇشىن، كول تالابىن
جىلتىراعان سوزدەرمەن ساۋدالا مۇڭ.
مەن-بەيشارا دالامنىڭ ايتقان سىرىن
پەندەلەردىڭ تىلىنە اۋدارامىن!
جۋسان ۋىتى تامشىلاپ وزەگىمنەن،
ولەڭ ەكەندىگىمدى سەزەمىن مەن.
ەي، ۋاقىت، ءسوز بەرمە،
بەرسەڭ، ماعان
ۇلىپ شىققان ويلاردىڭ كەزەگىن بەر!
دايىنداعان – قاجىبەك ايدارحان
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.