ەەڭ جاڭا مازمۇندار
2022-جىلى 7-ايدىڭ 6-كۇنى 150-سان
2022-جىلى 7-ايدىڭ 6 -كۇنى 150 ـ سان
قىزىل قايىق رۋحىن اسقاقتاتىپ، جاڭا ءداۋىردىڭ نۇر-شۇعىلاسىن ايگىلەدى
ايماعىمىز تۇڭعىش كەزەكتى كاسىپتىك شەبەرلىك باسەكەسىن وزدىردى
لي جۇڭچياڭ: ساقشىلىق ارمانىن سىندارلى ناتيجەسىمەن ۇشتاي ءتۇستى
ەرىكتى قىزمەت وتەۋ ماقساتىن ەستە بەرىك ساقتاپ، جاسىل تاۋ، تۇنىق سۋدى جانىنداي قورعادى
ايماق 4-كەزەكتى باسشى كادرلاردىڭ ەكونوميكانىڭ جوعارى ساپالى دامۋىن ىلگەرىلەتۋ قابىلەتىن، ساپاسىن جوعارىلاتۋ ارناۋلى كۋرسىن وتكىزدى
تەاتر كوركەمونەرىن ايگىلەپ، كوركەمونەر اۋىس -كۇيىسىن ىلگەرىلەتتى
قۇربان ايت مۋزيكا كەشى وتكىزىلدى
120 ءتۇرلى سالىق جيناۋ كاسىبىن شوعىرلى ۇلگىدە شينجياڭ بويىنشا ءبىر تۇتاس ءبىتىرۋ جۇزەگە استى
«شي جينپيڭ ەل باسقارۋ جونىندە» 4 - تومى شياڭگاڭدا تاراتىلدى
اۋلاسىندا ارا باعىپ اۋقاتتاندى
سۇرلەمدىك جۇگەرىگە وراق سالىندى
جەمىس جۇگەرى بازارعا سالىندى
شىعىس سولتۇستىك ازاتتىق رايونىنا اتتانۋ بۇراڭ دا شۇعىلالى ساپاردى ايگىلەدى
جاڭ يانجۇي: اۋا رايىن بارلاۋشى مامان
شيحۋ: بالىق اۋلاۋدى دانەكەر ەتىپ، اۋىل - قىستاق ساياحاتىن ىلگەرىلەتتى
ايماقتىق حالىق قۇرىلتايى قىزمەت كوميتەتى 2022 -جىلعى 2 -رەتكى ءماجىلىسىن اشتى
تارباعاتاي ايماعى 2 - توپتاعى ساۋداگەر شاقىرىپ، قارجى ەنگىزۋ نىساندارىنا شوعىرلى قول قويۋ جانە الدىڭعى جارىم جىلداعى ساۋداگەر شاقىرىپ، قارجى ەنگىزۋ قىزمەتىن قورىتىندىلاۋ ءماجىلىسىن اشتى
2022-جىلى 7-ايدىڭ 5 -كۇنى 149 ـ سان
”ءبىر ەل، ەكى ءتۇزىم“ − جاقسى ءتۇزىم، وعان، ءسوز جوق، ۇزاق ۋاقىت تاباندى بولۋ كەرەك
العىس جىرىن پارتياعا ارنادى
”ياۋجانزىنى تانىستىرۋشىنىڭ“ ەستەلىگى
اۆتونوميالى رايوننىڭ پارتيا، ۇكىمەت ۋاكىلدەر ۇيىرمەسى حىبەيدا ۇيرەنۋدە، تەكسەرۋدە بولدى
تيانشان الابى جاراسىمدىلىق كارتيناسىمەن كەستەلەندى
پارتيانىڭ 100 جىلدىق كۇرەسىنىڭ تاريحي تاجىريبەلەرىن اناعۇرلىم ويداعىداي يگەرۋ جانە قولدانۋ كەرەك
شي جينپيڭ شياڭگاڭ عىلىم باقشاسىندا قىزمەت تەكسەردى
شياڭگاڭ وتان قۇشاعىنا ورالعاندىعىنىڭ 25 جىلدىعىن قۇتتىقتاۋ جينالىسى جانە شياڭگاڭ ەرەكشە اكىمشىلىك رايونى 6 - كەزەكتى ۇكىمەتىنىڭ مىندەتكە وتىرۋ سالتى سالتاناتپەن وتكىزىلدى
شي جينپيڭ شياڭگاڭعا باردى
2022-جىلى 7-ايدىڭ 4 -كۇنى 148 ـ سان

اڭگىمەلەر

جولدانعان ۋاقىتى : 2014/9/29 18:12:44

كوز جاسى

قايىرشى كەمپىر ۋسادبانىڭ قاقپاسىن قاقتى. كيگەنى كەمپىردىڭ البا-جۇلبا، اياعىندا شۇلعاۋدان جامان كەمپىردىڭ جىرتىق شۇلىعى، باشپايى اعاش، كوز ۋايىمنان شۇڭىرەيىپ كەتكەن.

قولىنا ەلۋ تيىن ۇستاتىپ سوزگە تارتتىم:

-اجەي، سەنىڭ بارماعان  جەرىڭ، باسپاعان تاۋىڭ جوق، سوندا نە قىزىق كوردىڭ؟

كەمپىر ەگىلىپ تۇرىپ جىلادى:

-ونىڭ نەسىن سۇرايسىڭ،  قاراعىم، نە كورمەدى دەيسىڭ!

اياعىن شالىس سۇيرەتىپ جىندى ۆانيا كەلە جاتىر، شاشى اپپاق، ونىسىن جۇلمالاپ قىرقىپ تاستاعان، ۇستىندە ايەلدىڭ كويلەگى، يىعىندا دوربا.

-ۆانيا، امانسىڭ با! قال قالاي؟

ول سىلەكەيىن شۇبىرتىپ ىرجيىپ كۇلدى:

-ءجۇرمىز عوي، كوكە، كول-كوسىر جاستىڭ كومەگىمەن! كول-كوسىر جاستىڭ قۋاتىمەن!

كاپيتال

قارنى شارتيعان قىپ-قىزىل كۆاس ساتۋشى بۇكىل جارمەنكەنى باسىنا كوتەرىپ شىرىلداپ ايعايلاپ تۇر:

-مىنەكي، يىسكەسەڭ تاناۋىڭدى جاراتىن، ىشسەڭ وڭەشىڭدى قاباتىن تەنتەك كۆاس قايناپ تۇر!

توپ ىشىندە اباجاداي بوركىن جەلكەسىنە باسىپ كيگەن الپامساداي مۇجىق قولتىعىنا قىسقان اق ناندى ارپاداي اساپ كەلەدى، اۋزىن كەرە شايناعاندا پىسىلداعان تاناۋى شەلەكتەي بوپ كەتەدى.

-كۆاسىڭنىڭ قۇنى قانشا؟

-بوتەلكەسى ءبىر سوم، ستاكانى جەتى تيىن.

-ءبىر تيىنعا شىرپ ەتكىزسەڭ قايتەدى؟

-باۋىرىم، شىرپ ەتكەنگە تورعاي دا شىرىلدامايدى.

مۇجىق ەزۋىن كەرە شايناپ ويلانىپ تۇردى دا كۇرسىنىپ سالدى:

-جوق، جەتى تيىن تىم قىمبات ەكەن. وعان كاپيتال مۇمكىندىك بەرمەيدى.

كومەتا

الدەبىر كومەتا كەلە جاتىر دەگەنگە اۋىلدا دا، اۋلادا دا ەشكىم سەنبەدى. «ول انشەيىن باياعى زاماندا ءبىر بولعان نارسە عوي» دەستى. ءبىر كۇنى ءتۇن ىشىندە سارايدىڭ ارتقى جاعىنان، باتىس كوكجيەكتە سوڭىنا شۇبىرعان قۇيرىعىن تاستاپ جارىم اسپاندى جارىق قىلىپ الدە نە زاۋلاپ ءوتتى.

مىرزالار باسپالداق ۇستىندە قاراپ تۇرىستى. بىلايعى جۇرت لاشىقتان شىعىپ شوقىنىسىپ جاتتى. ەرتەڭىندە ستاروستا قوجايىن ءۇيىنىڭ شاتىرىنا شىعىپ بۋلىقتى تاقتايمەن شەگەلەپ جاتقان. تارسىلعا ۇيدەن جۇگىرە شىققان يەسى ايعاي سالدى:

-ءاي، ستاروستا! ناعىپ   جاتىرسىڭ؟

-بۋلىقتى بىتەپ جاتىرمىن.

-نەگە؟-كومەتا كىرىپ كەتپەسىن دەپ.

سىرعاۋىل

-سالەمەتسىزبە، مىرزا، قۇزىرىڭىزعا قۇلدىق! قالاي كۇن كورىپ جاتىرسىڭ دەيسىز بە؟ قۇدايعا شۇكىر. ايتەۋىر تىرپىلداپ ءجۇرىپ جاتىرمىن عوي. جارمەڭكەدەن جارمەڭكەگە، بازاردان بازارعا جۇگىرەمىن... جاس بولسا قىرىققا تاياپ قالدى. تىنىم تاپپاي بەزەكتەگەنىمدى كورىپ مىقتى ەكەن دەپ ويلاپ قالماڭىز. جانىمدى ساقتايتىن باسپانامنىڭ بارىنا دا قۇدايعا رازىمىن. وزەگىم تالىپ، ولەيىن دەپ جەتەمىن، ايتەۋىر ءوز ءۇيىم عوي... ءبىراق ول دا قايبىر جەتىسىپ تۇر دەيسىڭ، شىنىمدى ايتسام، ءتىرى پەندەنىڭ باسىنا سالماسىن، جالعىزدىقتان جارىلىپ كەتە جازدايمىن. سلوبودكانىڭ تىرشىلىگىن ءوزىڭىز بىلەسىز: قاپىرىق ىستىق، قۇرعاقشىلىق، كۇن دە ءبىتىپ بەرمەيدى… ءۇي بولسا قاڭىراپ تۇر، قاتىن ولگەن، بالالاردى دا و دۇنيەگە اتتاندىرىپ جىبەرگەم. جالعىز شەشەم عانا قالقايىپ ءجۇر. ءبىراق سوڭعى كەزدە ول دا سىر بەرە باستادى: شاما كەتكەن، اياعىن زورعا سۇيرەتەدى، قۇلاق كەرەڭ، كوز كورمەيدى، ەستەن ايرىلىپ الجىپ وتىر، جۇدەگەنى سونشالىق، قازىر تابىتقا سالا سالساڭ دا سيا كەتەدى. كەزىندە قانداي ايەل ەدى دەسەڭىزشى! كورىك دەسەڭ كوركى بار، اجارى ايدان اپپاق! ال قازىر دىم دا جوق، سىرعاۋىل بوپ قالدى.

قاريا

قۋداي اپپاق، دۋدىراعان قالىڭ شاش اعارىپ كەتكەن، كۇنى بويى تەمەكى سوراپتايدى. قۇزعىن سارىدەن ويانادى، تۇرا سالىپ تەمەكى تارتپاسا، جىندى ادام سەكىلدى، ىمعا دا، دىمعا دا تۇسىنبەيدى.

ادامعا دا، قۇدايعا دا قاجەتى جوق، مىناۋ جارىق دۇنيەگە دە، ۇرىق-شارقىنا دا، جۇراعاتقا دا جات (ايتەۋىر اكە دەپ، اتا دەپ الداي سالىسقان بولادى)، ۇزاماي ءبىر كۇنى ءۇن-ءتۇنسىز ولە سالاتىن شىعار، مىناۋ مەششاننىڭ وتباسىنان، مىناۋ تۇكپىردەگى مىلقاۋ قالاشىقتان ماڭگىلىك جوعالار، سوندا عۇمىر بويى تەمەكى تۇتىنىنە قاقالىپ، ونىڭ نە ءۇشىن، كىم ءۇشىن ءومىر سۇرگەنىن بىرەۋدەن سۇراپ كور، ءبىلىپ كور.

دەگەنمەن ونىڭ دا ءوز ورنى بار ەدى:

-اتا، تاماققا كەلىڭىز، كەسپە سۋىپ بارادى.

-ءجا، ىشە بەرىڭدەر، مەنسىز-اق ىشە بەرىڭدەر... كەيىن قالعان-قۇتقانعا دا رازىمىن...

ال شىندىعىندا، سول تاماقتى شىدامسىزدانا كۇتىپ وتىرعان قۇزعىنسارىدەن.

-اتا، ەڭ بولماسا ءىش كيىمىڭىزدى اۋىستىرىپ كيمەيسىز بە، سىزدە ءىش كيىم دەگەن قاتپار-قاتپار جاتقان جوق پا!

-مۇنىڭا دا راقىمەت! قاتپار-قاتپار دەيسىڭ بە؟ شىراعىم-اۋ، مەندە جىرتىق شۇلعاۋ دا قالعان جوق قوي! بولسا ونى نەسىنە اياپ وتىر دەيسىڭ! كەلىن شىراق، ماعان ەندى تۇكتىڭ دە قاجەتى جوق. شۇكىر، از ءومىر سۇرگەم جوق، قاناعات كەرەك، قۇدايدان ەندىگى بار تىلەگىم تەزىرەك ولسەم دەيمىن...

ال، ونىڭ ساراڭدىعىندا شەك جوق، دىرىلدەپ-قالشىلداپ جيعان-تەرگەنىن اڭدىپ ءجۇر، جارىق دۇنيەنى قيمايدى، جۇزگە جەتسەم دەپ كوكسەيدى.

نە ءۇشىن؟

ونى ءوزى دە بىلمەيدى.

«جاتتىڭ جانى جۇمباق»  دەسەدى. جوق، ءوز جانىڭ ودان دا جۇمباق.

قارساڭدا

قالا. ۆوكزالعا تارتىپ كەلەمىز. ارباكەش ەڭىسكە قاراي قۇيعىتا جونەلدى، الدىمىزدا وزەن ۇستىندەگى تار كوپىر. كوپىر استىنداعى تاياز جاعالاۋدا ەكى يىعى ەدىرەيىپ، تەرىس قاراپ تۇرعان بوسياك جەمتىك قارپىعان اش يتتەي اسىعىپ-ۇسىگىپ كىر شۇپەرەكتىڭ اراسىنان بىردەمەنى جەپ جاتىر. ارتىمىزدان سالدىر-كۇلدىر ىردۋان اربا قۋالاپ كەلەدى، ىردۋان اراسىنان سالبىراعان مۇجىقتاردىڭ تالىستاي اياقتارى قورقىنىشتى-اق. ءبارىنىڭ ءۇستى-باسى ۇن تيىرمەنشىلەر، ءبارى دە گۇجبانداي ءداۋ مۇجىقتار، ءبارى دە وڭشەڭ جيرەن باس، جالاڭباس، قىزىل كويلەكتى قىناي بۋىنىپ العان...

بۇدان سوڭ ۆاگون. ەكىنشى كلاس. مەنىڭ قارسى الدىمدا  وتىرعان قىرىقتار شاماسىنداعى الدە ءبىر مىرزا تاڭقيعان شەلەكتەي كەلتە تاناۋىنا التىن كوزىلدىرىك كيىپ الىپ، مەنى مەنسىنبەي وسقىرىنىپ قايتا-قايتا تۇرا بەرەدى دە قايتا-قايتا قاپتالعان چەمودانىن قوزعاپ-قوزعاپ قويادى. جيناقى، ءارى سابىرلى، ءارى وزىنە سەنىمدى، بارعا توق مىرزا باعاسىن دا تىم جوعارى باعالايتىن بولسا كەرەك...

دەگەنمەن، ون التىنشى جىلدىڭ كۇزى دە جاقىنداپ قالعان ەدى...

ماسىل

كەشكى استان كەيىن شاي ىشتىك تە پوچتادان جاڭا عانا  اكەلگەن گازەتتەردى اسىعىس قاراپ شىقتىق. تۇك تە جوق، باياعى سول بوس مىلجىڭ. اقىرى ءبىر-بىرلەپ ءبارى دە ۇيىقتاۋعا كەتتى. جالعىز قالدىم، وقىپ  وتىرمىن، ادامنىڭ جىنىن كەلتىرەدى-اۋ! كەنەت تەرەزەگە كوزىم ءتۇسىپ كەتكەنى: ايقىش-ۇيقىش ەسكى رامكانىڭ ار جاعىنان ىزديعان سامىرسىن مەن شىرشانىڭ ۇشار بيىگى، ءبىر-بىرىمەن ايقاسقان بۇتاقتاردىڭ، قىلقان جاپىراقتاردىڭ عاجايىپ سۋرەتى كورىنەدى، ونىڭ ار جاعىندا ساۋىردەگى ايلى ءتۇننىڭ اسپانى. تەز تۇرىپ جالشىلار لاشىعىنا باردىم دا كارتۋزم مەن تاياعىمدى الا سالىپ باسپالداققا اتىپ شىقتىم.

ءتۇن قانداي عاجاپ! ياپىر-اۋ، مىناۋ نەتكەن ءتۇن!

باسپالداق پەن ءۇيدىڭ بۇل جاق بەتى ايدىڭ كوگىلدىر كولەڭكەسىنە مالىنىپ تۇر، قارسىدا جارقىراعان كەڭ اۋلا، اكپەن سىلاعان لاشىق پەن قورا-قوپسىنىڭ سۇلدەرى جالتىرايدى. باسپالداقتان سەكىرىپ ءتۇستىم دە جەلپىنىپ باققا بۇرىلدىم: ءتۇن كىرشىكسىز ءارى قۇرعاق، تولعان اي شىرقاۋ بيىكتە، اسپان شايداي اشىق. اللەياعا كىردىم، اعاشتار ءالى جالاڭاش، كەبەرسىگەن جەردە تاربايىپ جاتقان قىسقا كولەڭكەنى تاپتاپ جۇرگەن دە راقات. جالاڭاش باقتىڭ ول شەتى مەن بۇل شەتى اڭىراپ تۇر.
اللەيادان سيرەن مەن ىرعاي اراسىنداعى ءيىر سوقپاققا ءتۇستىم: ايلى ءتۇن باق ىشىنە ادەمى اجار توككەندەي، الاڭقايداعى گۇلدەي باستاعان الاسا الما     اعاشتارى دا جايناپ قالىپتى. توبەڭنەن تونگەن اي تۋرا بەتىڭە قادالادى. باقتىڭ سوناۋ تۇكپىرىندە كۇتىمسىزدىكتەن شىرۋگە جاقىن ەسكى فليتادان جىلتىراعان وت كورىندى دە سولاي  قاراي ءجۇردىم.

باسپالداقپەن كوتەرىلىپ، سەڭكەنىڭ ەسىگىن اشتىم دا تۇككە تۇسىنبەي اڭتارىلىپ تۇرىپ قالدىم. قۇددى توزاق پا دەرسىڭ! كىرە بەرىس كوك ءتۇتىن، كوك ءتۇتىننىڭ اراسىنان ۇستەل ۇستىندەگى شامنىڭ جارىعى ولەۋسىرەپ ارەڭ كورىنەدى، ال پەش كومەيىنەن شالقىعان قىپ-قىزىل جالىن جالاقتاپ تۇر. شال ەدەندە تىزەرلەپ وتىرىپ الىپ وت جاعىپ جاتىر. اربايعان تارامىس قولىمەن قۋرايدى بىتىر-بىتىر سىندىرىپ پەش كومەيىنە نىعارلاپ تىققان بولادى. ءبىراق ءتۇتىن ارالاس لاپ ەتكەن جالىن كەيىن قاراي    تەبەدى.

مەن ەسىكتى سارت جاۋىپ پەش قاسىنا جەتىپ كەلدىم. شال ەستىمەي مە، الدە ەستىگىسى كەلمەي مە، بىلق ەتپەدى. ءتىپتى اينالىپ قارامايدى دا قۋرايدى بۇراپ تىعىپ، وت كورسە ادامنىڭ قادالىپ قالاتىن ادەتى عوي، بەجىرەيىپ پەشتەن كوز المايدى. ۇستىندە زاماننان بەرى تۋلاق بوپ قالعان ساتال-ساتال شولاق تون، باسىندا مەنەن قالعان ەسكى شىلياپا. ەكى كوزى جارا شىققانداي تۇتىننەن قىپ-قىزىل، سوراسىنان جاس اققان، سونى دا كاپەرىنە الماستان وتقا تەسىلۋىن قويار ەمەس. قىرتىس-قىرتىس شالبار بەت، يەكتە شوشايعان بەس تال اق قىلشىق.

-امانبىسىڭ، ەفرەم، ۇيىقتاماي جالعىز ناعىپ وتىرسىڭ؟

ول ۇيقىدان ويانعانداي ودىرايىپ بەتىمە قارادى. ودان سوڭ جۇلىپ العانداي:

-جالعىزى نەسى؟ـ دەدى.

-جالعىز بولماعاندا شە، جۇرتتىڭ ءبارى ۇيىقتاپ جاتىر، ال سەن ءالى وتىرسىڭ.

-جالعىز ەمەسپىن.

-قاسىڭدا كىم بار؟

-قۇداي بار.

-پەشتى نەگە جاقتىڭ؟

-جاقپاعاندا قايتەيىن! جاتىپ ەدىم، توڭدىم. قاتىپ قالا جازدادىم. جىلى سارايدا جاتقان ساعان راقات قوي!

-مورجانى دا دۇرىستاپ اشپاعانسىڭ-اۋ، كوردىڭ بە، ءتۇتىننىڭ جارتىسى ۇيدە.

-دۇرىستاپ اشۋعا بويىم دا جەتپەيدى. ايتەۋىر اشقان بولىپ بىقسىتىپ وتىرمىن دا... ءتۇندى تاڭعا، تاڭدى تۇنگە اينالدىرعان دەگەن وسى. سولاي، زامانداستار ءولدى، ال جەر جارىقتىق مەنى ۇمىتتى. امال جوق! قالاساڭ دا، قالاماساڭ دا سۇيرەتىلىپ جۇرە بەر!

-ونىڭ دا راس. ايتپاقشى، سەندە تۋعان-تۋىسقان دا جوق قوي؟

-ونى ماعان كىم بەرىپتى!

-بالا دا جوق شىعار؟

-بولعان، بولعان دا جوعالعان. ال قاتىن مەنىڭ نە تەڭىم؟

ەكەۋگە ەپتەپ ءومىر ءسۇرۋ جەڭىل عوي.

-ول دا اششى. كورگە ەكى  ادامدى قاتار كومبەيدى.

-سونىمەن حال ناشار دەشى؟

-جاتتىڭ پەشى دە جانبايدى.

-ال وزىڭدىكىن نەگە جاقپايسىڭ؟ بۇعان كىم كىنالى؟ جۇرتتىڭ ايتۋىنشا، سەندە باسپانا دا بار دەيدى عوي؟

-ءوزىم كىنالىمىن. ۇيدە ءجۇز ەسە جۇلىنىڭ ۇزىلەدى ءارى ۋايىم ماسىل. ءارى ۋايىم، ءارى مۇڭ، سوردان باسقا دىم جوق... ال مۇندا مەن قۇس سەكىلدىمىن، تۇراسىڭ دا كەتەسىڭ، باسقا ۋايىم جوق،-ول ءسال ويلانىپ قالدى،-ءۇي دەيمىن-اۋ، ول قاڭىراعان ءتورت قابىرعا. جەرى دە جوق.

-ەلدىڭ ايتۋىنشا ەندى جاقسى بولاتىن شىعار. ريەۆوليۋتسييا دەسەدى. ەستىگەن بولارسىڭ؟

-ريەۆوليۋتسييا دەگەنى تاعى نە پالە؟

-جۇرتتىڭ بارىنە جاقسىلىق اكەلەدى.

-ونداي جاقسىلىق ەش   ۋاقىتتا بولمايدى.

-بولماعانى نەسى؟ مىسالى، ساعان جەر بەرەدى،-كەنەت ول قۋراي سىندىرۋىن توقتاتا قويدى دا جۇرەسىنەن وتىرىپ، ماعان قاراپ اشۋلانا سويلەدى،-بىلەمىن،بىلەم عوي، ەستىگەنمىن. پاتشانى تاقتان تايدىرىپتى دەسەدى.

-ءيا، تايدىردى. وندا تۇرعان نە بار، جامان با؟

-ونى مەن بىلمەيمىن. بىلگىم دە كەلمەيدى. تەك ءبۇلدىرۋ.

-نەنى ءبۇلدىرىپتى؟

-ءبارىن دە، الباستى باسقىر اقىماقتار! تىپ-تىنىش ءجۇر ەدىك ۋايىم-قايعىسىز. ەندى كەلىپ بارىنە ءوزىڭ باس اۋىرتاسىڭ با؟

-جەر بەرەدى ەمەس پە.

-ۋادە بەرىپتى! ۋادە بەرەدى عوي! مۇمكىن ونىڭ ماعان قاجەتى جوق شىعار. مەنەن سونى سۇراپ پا؟

ول تەرىس بۇرىلىپ تاعى دا مازداپ جاتقان وتقا ءۇڭىلدى، تاعى دا قۋرايدى بىتىرلاتىپ وتىرىپ ءسوزىن جالعاستىردى. ارىنى باسىلسا دا اشۋدىڭ ءىزى ءبىلىنىپ تۇر:
-مەن ەش جاقسىلىق كۇتپەيتىن جانمىن. قۇدايعا شۇكىر، ماعان ەندى ەش نارسەنىڭ قاجەتى دە جوق. ال مىرزالاردى قايرانسىز قالدىرۋعا بولمايدى. ولاردى دا ەسكەرۋ كەرەك. ولار شارۋا ىستەپ كورمەگەن ادامدار. ىستەر ەدى-اۋ، ءبىراق قولدارىنان كەلمەيدى.  اقىماقتىقپەن ولاردى سىرىپ تاستاۋعا بولمايدى. ايتۋىنشا، ولار ەندى جەردى وزدەرى جىرتاتىن بولىپتى دەسەدى. شەتىنەن    ەگىنجايعا ايداپ شىعادى ەكەنبىز! اقىماق باس نەنى ويلاپ تاپپاس دەيسىڭ! بۇل نەتكەن باسسىزدىق؟ سوندا نە، قۇس سۋدان شىقپاي، بالىق اسپاندا ۇشۋى كەرەك پە؟ دەمەك، بۇل مۇيىزدەۋ دەگەن ەمەس پە؟ جوق، مۇندا جاقسىلىقتىڭ ءيىسى دە جوق! ول الباستىلار مازاق قىلىپ   وتىر. (داۋىسىن كوتەرىپ) ماعان ونىسىن زورلىقپەن نەگە تاڭادى؟ ماعان ولاردىڭ جەرى سوقىر    تيىنعا كەرەگى جوق، ول انشەيىن قۇر ماسىل عوي. مەنىڭ جەرىم (ساۋساعىمەن جەردى نۇقىپ)، مەنىڭ جەرىم مۇندا   ەمەس پە! ماعان ەندى ءبىر-اق جول قالدى. بوستاندىقتا ءجۇرىپ كۇنامدى جۋىپ-شايىپ، تازارۋىم كەرەك. باستان نە كەشتىم دەيسىز؟ اۋەلى جاس بولدىم دەدىم، ودان جاس ۇلعايدى دەدىم، ەرتەڭمەنەن  ەزىلىپ جۇرگەندە شامادا كەتتى، قازىر شىركەۋگە دە جەتە الماي وتىرعان ءتۇرىم مىناۋ. بۇل ەرتەڭ سول  وڭباعانداردىڭ دا باسىنا كەلەدى!

-كىمدەردىڭ؟

-اركىمنىڭ.

شال قاباعىن ءتۇيىپ ءۇنسىز قالدى. ارتىنان تاعى دا ماعان بۇرىلىپ، داۋىسى وزگەرىپ سالا بەردى دە اجىمدى بەتىن جيىرىپ، جىميىپ كۇلگەن بولدى:

-ولە سالار ەدىم-اۋ، پوپقا تولەيتىن ءۇش سومنىڭ ءوزى ۋايىم!-دەپ سەلكىلدەپ كۇلدى،-وندا بارعان سوڭ دا سۇراماي ما، ماس بولماي ءلاززاتسىز ولگەنىڭ قالاي دەپ؟

-سوندا و دۇنيەگە دە ماس بولىپ بارسىن دەگەن نۇسقاۋ بار ما؟

-ەندى قالاي؟ مىندەتتى تۇردە! ەپتەپ جاسارىپ، كوڭىلدەنىپ، اشىق-جارقىن ىرباڭداپ دەگەندەي...-كەنەت ول تاعى دا قيتىعىپ، شاقارلانىپ شىعا كەلدى، –ال الگى شارۋا جونىندە مەن دىم بىلمەيمىن! بىلگىم دە كەلمەيدى!

مەن وعان ۇزاق قارادىم. ول دا وتقا قاراپ وتىرىپ الدى.

-جا، كورىسكەنشە،-دەدىم   اقىرى،-ەندى جات تا ۇيىقتا، قايىرلى ءتۇن بولسىن.

-ۇلگىرەمىن، قارا جەرگە كىرگەن سوڭ دا جامباس شىريتىن شىعار،-دەدى ول موينىن بۇرماستان سەلسوق قانا،- بار، بارا عوي، قوش بول...

مەن تىسقا شىقتىم دا تاعى دا باق ارقىلى قىرماننان ءوتىپ دالاعا بەتتەدىم.

ىرسيعان سيرەك باق قاراۋىتىپ ارتتا قالدى.

قىر باسىنداعى جالبىراعان كارى قايىڭنىڭ جەلكەسىنەن الدە ءبىر جارىق جۇلدىز جىمىڭ قاعىپ سىعالاپ تۇر ەكەن.



دايىنداعان-قاجىبەك ايدارحان



رەداكتورى: ارداق كامالقان قىزى
 
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.

 
powered by IlgharCMS 3.2 www.ilghar.cn