ەەڭ جاڭا مازمۇندار
2022-جىلى 7-ايدىڭ 6-كۇنى 150-سان
2022-جىلى 7-ايدىڭ 6 -كۇنى 150 ـ سان
قىزىل قايىق رۋحىن اسقاقتاتىپ، جاڭا ءداۋىردىڭ نۇر-شۇعىلاسىن ايگىلەدى
ايماعىمىز تۇڭعىش كەزەكتى كاسىپتىك شەبەرلىك باسەكەسىن وزدىردى
لي جۇڭچياڭ: ساقشىلىق ارمانىن سىندارلى ناتيجەسىمەن ۇشتاي ءتۇستى
ەرىكتى قىزمەت وتەۋ ماقساتىن ەستە بەرىك ساقتاپ، جاسىل تاۋ، تۇنىق سۋدى جانىنداي قورعادى
ايماق 4-كەزەكتى باسشى كادرلاردىڭ ەكونوميكانىڭ جوعارى ساپالى دامۋىن ىلگەرىلەتۋ قابىلەتىن، ساپاسىن جوعارىلاتۋ ارناۋلى كۋرسىن وتكىزدى
تەاتر كوركەمونەرىن ايگىلەپ، كوركەمونەر اۋىس -كۇيىسىن ىلگەرىلەتتى
قۇربان ايت مۋزيكا كەشى وتكىزىلدى
120 ءتۇرلى سالىق جيناۋ كاسىبىن شوعىرلى ۇلگىدە شينجياڭ بويىنشا ءبىر تۇتاس ءبىتىرۋ جۇزەگە استى
«شي جينپيڭ ەل باسقارۋ جونىندە» 4 - تومى شياڭگاڭدا تاراتىلدى
اۋلاسىندا ارا باعىپ اۋقاتتاندى
سۇرلەمدىك جۇگەرىگە وراق سالىندى
جەمىس جۇگەرى بازارعا سالىندى
شىعىس سولتۇستىك ازاتتىق رايونىنا اتتانۋ بۇراڭ دا شۇعىلالى ساپاردى ايگىلەدى
جاڭ يانجۇي: اۋا رايىن بارلاۋشى مامان
شيحۋ: بالىق اۋلاۋدى دانەكەر ەتىپ، اۋىل - قىستاق ساياحاتىن ىلگەرىلەتتى
ايماقتىق حالىق قۇرىلتايى قىزمەت كوميتەتى 2022 -جىلعى 2 -رەتكى ءماجىلىسىن اشتى
تارباعاتاي ايماعى 2 - توپتاعى ساۋداگەر شاقىرىپ، قارجى ەنگىزۋ نىساندارىنا شوعىرلى قول قويۋ جانە الدىڭعى جارىم جىلداعى ساۋداگەر شاقىرىپ، قارجى ەنگىزۋ قىزمەتىن قورىتىندىلاۋ ءماجىلىسىن اشتى
2022-جىلى 7-ايدىڭ 5 -كۇنى 149 ـ سان
”ءبىر ەل، ەكى ءتۇزىم“ − جاقسى ءتۇزىم، وعان، ءسوز جوق، ۇزاق ۋاقىت تاباندى بولۋ كەرەك
العىس جىرىن پارتياعا ارنادى
”ياۋجانزىنى تانىستىرۋشىنىڭ“ ەستەلىگى
اۆتونوميالى رايوننىڭ پارتيا، ۇكىمەت ۋاكىلدەر ۇيىرمەسى حىبەيدا ۇيرەنۋدە، تەكسەرۋدە بولدى
تيانشان الابى جاراسىمدىلىق كارتيناسىمەن كەستەلەندى
پارتيانىڭ 100 جىلدىق كۇرەسىنىڭ تاريحي تاجىريبەلەرىن اناعۇرلىم ويداعىداي يگەرۋ جانە قولدانۋ كەرەك
شي جينپيڭ شياڭگاڭ عىلىم باقشاسىندا قىزمەت تەكسەردى
شياڭگاڭ وتان قۇشاعىنا ورالعاندىعىنىڭ 25 جىلدىعىن قۇتتىقتاۋ جينالىسى جانە شياڭگاڭ ەرەكشە اكىمشىلىك رايونى 6 - كەزەكتى ۇكىمەتىنىڭ مىندەتكە وتىرۋ سالتى سالتاناتپەن وتكىزىلدى
شي جينپيڭ شياڭگاڭعا باردى
2022-جىلى 7-ايدىڭ 4 -كۇنى 148 ـ سان

ويلار

جولدانعان ۋاقىتى : 2014/10/13 11:35:13

ۆاسيلي شۋكشين   (رەسەي)

  ءتۇن بالاسىندا ىستەيتىنى  وسى!

  سەلوداعى ابىر-سابىر باسىلىپ، جۇرتتىڭ كوزى ۇيقىعا بارا بەرە-اق، ول ىسكە كىرىسەدى... سەلونىڭ ءبىر شەتىنەن شىعا سالا ازىناتىپ كەلە جاتقانى سايتاننىڭ، جۇرە تارتىپ اڭىراتادى دا وتىرادى. ال ونىڭ گارمونى دا  ەرەكشە-يتشە ۇليدى. ءجىبى تۇزىك ءۇن دە جوق، داۋىس تا جوق دارىلداعان بىردەڭە.

  نينكا كرەچەتوۆاعا اۋىلداستارى:

  -مىناعان سەن تەزىرەك كۇيەۋگە شىق! بۇل جەكسۇرىن مازامىزدى ابدەن الىپ بولدى،-دەپ جىگى-جاپار بولادى.

  -ونى تىڭداپ قايتەسىزدەر؟ ۇيىقتاي بەرىڭىزدەر،-دەيدى.

  -قايداعى ۇيقى، تەرەزەنىڭ ءدال تۇبىنە كەلىپ كۇجىلدەتىپ تۇرعانى جەكسۇرىننىڭ. وزەن جاققا دا قيا باسپاستان، وسى ماڭدا جۇرەدى دە قويادى اينالسوقتاپ. قاساقانا دەرسىڭ.

  ال، ەڭگەزەردەي، سالپاۋىز كولكا مالاشكيننىڭ ءوزى كوزدەرىن سىقسيتا قالىپ:

  -قاقىم بار، زاڭدا بۇل جونىندە ەشقانداي باپ جازىلماعان،-دەيدى.

  وسىنداعى كولحوزدىڭ پرەدسەداتەلى ماتۆەي ريازانتسيەيەۆتىڭ ءۇيى ءدال كولكا مۇيىستەن اينالا بەرە كوشكەگە شىعاتىن بۇرىشتا. مۇيىستەن شىقپاي جاتىپ دارىلداعان گارمون داۋىسى سول ءۇيدى اينالىپ وتەدى دە. سودان كوپكە دەيىن ەستىلەدى دە تۇرادى.

  گارمون داۋىسى مۇيىستەن باستالىسىمەن-اق ماتۆەي توسەكتەن باسىن كوتەرىپ الىپ، ەكى اياعىن تومەن سالبىراتىپ جىبەرىپ:

  -جەتەدى ەندى، ەرتەڭ ونى كولحوزدان شىعارامىز. سىنىققا سىلتاۋ ىزدەپ تابامىن دا شىعارامىن،-دەيتىن. ول ءتۇن سايىن وسىنى ايتا تۇرا، كولكانى كولحوزدان شىعارعان دا جوق. تەك كۇندىز ونىمەن كەزدەسە قالعاندا:

  -سەن وسى ءتۇنى بويى سايران سالعاندى قوياسىڭ با، جوق پا؟-دەپ سۇرايدى،- كۇندىز جۇمىستان سوڭ جۇرت دەم الىپ جاتسا، سەن زىكىر سالىپ ولارعا مازا بەرمەيسىڭ!

  -قاقىم بار،-دەيدى كولكا باياعىسىنشا.

  -كورسەتەمىن مەن ساعان قاقىڭدى!

  بار بولعانى سول. وسىمەن اڭگىمە دە بىتەتىن. ال ماتۆەي كۇن سايىن توسەگىنىڭ ۇستىندە وتىرىپ الىپ:

  -ەرتەڭ شىعارامىن،-دەۋدەن جازبايدى.

  سونان سوڭ توسەك ۇستىندە ۇزاق وتىرىپ ويعا كەتەدى...

  گارمون كوشە بويلاي ۇزاپ،  ونىڭ ءۇنى وشكەننەن سوڭ دا ماتۆەي وتىرا بەرەدى. ورىندىق ۇستىندەگى شالبارىن سيپالاپ تاۋىپ، ونىڭ قالتاسىنان شىلىمىن الىپ، تارتا باستايدى.

  -تۇتىندەتپەشى، ارمەن!-دەپ كۇڭكىلدەيدى زايىبى الەنا.

  -ۇيىقتا،-دەيدى ماتۆەي.

  ويعا نە كەلدى سوندا! بىلايشا... ايتارلىقتاي ەشتەڭە دە جوق. تەك وتكەن كۇندەر ەسكە تۇسەدى.   ءبىراق تايعا باسقان تاڭباداي سايراپ تۇرعان ەشتەڭە جوق،  ۇزىك-ۇزىك، بۇلىڭعىر بىردەڭەلەر. دەگەنمەن، گارمون دارىلداپ، اشىق تۇرعان تەرەزەدەن سالقىن سامال ارالاس باقشاداعى جۋساننىڭ اششى ءيىسى اڭقىعان سونداي ءبىر ايلى تۇندە باسقا ءبىر ءتۇن ەسكە تۇسكەن-دى. ول وتە ءبىر تاستاي قاراڭعى ءتۇن بولاتىن. اكەسى جانە ءىنىسى كۋزما ۇشەۋى دەريەۆنيادان ون بەس شاقىرىم جەردە ءشوپ شاۋىپ جاتقان-دى. كۋزما كۇندىز تەرلەپ ءجۇرىپ بۇلاقتان مۇزداي سۋ ىشكەن ەدى. سول ءتۇنى ونىڭ تاماعى جۇتىندىرماي قىرىلدادى دا قالدى. اكەسى ماتۆەيدى ۇيقىدان وياتتى دا يگرەنكانى (ەڭ شالىمدى دونەن) ۇستاپ ءمىنىپ، قۇيعىتقان بويى بارىپ اۋىلدان ءسۇت اكەلۋگە جۇمسادى.

  -مەن مۇندا وت جاعا بەرەيىن... كۋزماعا ىستىق ءسۇت ىشكىزبەسەك، بالادان ايرىلىپ قالىپ جۇرەرمىز،-دەدى.

  ماتۆەي جايىلىپ جۇرگەن  اتتاردى ىزدەپ تاۋىپ، يگرەنكانى جۇگەندەپ ءمىندى دە، ونى تۇساۋ جىپپەن قامشىلاپ دەريەۆنياعا قاراي قۇيعىتتى. مىنە، ەندى... سول ماتۆەيگە كەشىكپەي الپىس جاس تولادى، ول كەزدە ون ەكى-ون ۇشتەگى بالا ەدى. سول ءتۇندى ءالى كۇنگە دەيىن ۇمىتقان جوق. ات تا، ادام دا قاراڭعى ءتۇن قوينىندا جۇلدىزداي اعىپ كەلەدى. ءتۇن دە بۇلاردى قارسى الىپ، شىق باسقان دىمقىل شوپتەردىڭ جۇپار ءيىسى بەتكە ۇرىپ تۇر. بالانى الدە ءبىر توسىن جەلىك بيلەپ العانداي، قۇر ەكپىن بوپ اعىپ كەلەدى. ۇشىپ كەلەدى دەرسىڭ، جەر بەتىنەن كوتەرىلە سالا ۇشا جونەلگەندەي. ءتۇن كوزگە تۇرتسە كورگىسىز، جەر دە، اسپان دا، ءتىپتى، استىنداعى اتتىڭ قۇلاعى دا كورىنبەيدى. تەك مۇنىڭ قۇلاعى عانا شۋلايدى، تۇنگى زۇلمات دۇنيە مۇنى قارسى الا جوڭكي زۋلاپ ءوتىپ جاتقانداي. كەيىندە قالعان ءىنىسىنىڭ حالى ناشار ەكەنى ەسىندە دە جوق. كوڭىلى تاسىپ، ونە بويىن اعىن بيلەپ العان... الدەقالاي ءبىر دەس بەرمەس قۋانىشتىڭ اڭساعان ارمانداي ءساتى تاپ بولعان.

   ... بۇدان سوڭ ول قايعىعا كەزدەستى. ول ءسۇت الىپ كەلگەندە، اكەسى كەنجەسىن كوكىرەگىنە باسىپ، ونى بەينە ءبىر الديلەگەندەي-اق وشاقتى اينالا جۇگىرۋمەن ءجۇردى.

   -سابىر ەت، بالام... مۇنىڭ قالاي؟ ءسال شىداي تۇر. شىداساڭشى، قازىر ءسۇت پىسىرەمىز، قازىر ەس جياسىڭ. اينالايىن... كوردىڭ بە انە، موتكا ءسۇت اكەلدى!..

  ال كىشكەنتاي كۋزمانىڭ تىنىسى تارىلىپ، ءجۇزى كوگەرىپ بارا جاتتى.

  ماتۆەيدىڭ سوڭىن الا شەشەسى كەلگەنشە كۋزما ءۇزىلىپ تە كەتتى. ەكى قولىمەن باسىن تايانىپ اكە وتىر، تەڭسەلە ءتۇسىپ، كۇيزەلە، كۇڭىرەنە اھ ۇرادى. ماتۆەي ىنىسىنە الدەقالاي ءبىر تاڭىرقاۋمەن شوشىنا قارادى. كۇنى كەشە عانا ونىمەن شوپكە اۋناپ، اسىر سالىپ جۇرگەن ەدى. مىنە، ءجۇزى قۋ شۇپەرەكتەي بولىپ بوتەن ءبىر بالا جاتىر... تاڭ قالارلىق ءبىر نارسە. جەكسۇرىن گارمون ونىڭ ەسىنە نەلىكتەن وسى وقيعانى ءتۇسىردى ەكەن؟ باسقا دا ەمەس، سول ءبىر ءتۇندى. ودان سوڭ دا تالاي داۋرەن ءوتتى ەمەس پە... ۇيلەنۋ، ۇجىمداستىرۋ، سوعىس. نەبىر تۇندەر كەلىپ، نەبىر تۇندەر كەتتى دە عوي! ءبىراق ونىڭ ءبارى دە كونەرىپ، ەستەن شىعىپ قالعان.

ماتۆەي ءومىر بويى قاجەتتى ىستەردەن باس تارتىپ كورگەن ەمەس. كولحوزعا كىرۋ كەرەك دەگەن ەدى، كىردى. ۇيلەنەتىن مەزگىل جەتكەن ەدى، ۇيلەندى. الەنا ەكەۋى بالالى-شاعالى بولدى، ولاردى  تاربيەلەپ ءوسىردى. سوعىس باستالعان ەدى، مايدانعا اتتاندى. جارالى بولدى دا باسقا جىگىتتەردەن بۇرىن اۋىلعا قايتىپ   ورالدى.

  «ماتۆەي، سەن پرەدسەداتەل بول. باسقا لايىقتى ادام جوق» دەسكەن ەدى. ءتوراعا بولدى. قادىرىنشە بۇل ىسكە دە توسەلە باستاعان. باسقالار دا وعان باۋىر باسىپ كەتتى. سول جۇكتى بۇل كۇنى بۇگىنگە دەيىن ارقالاۋمەن كەلەدى. جۇمىس دەگەن ءومىر بويى ونىڭ ەسىنەن ەكى ەلى شىققان ەمەس، جاتسا-تۇرسا ويلايتىنى جۇمىس.

  سوعىستا دا ويلاعانى سول جۇمىس بولعان. ونىڭ ومىرىندەگى قۋانىش تا، وكىنىش تە سول جۇمىسپەن بايلانىستى بولدى. كەيدە، ماسەلەنكي، اينالاسىنان «ماحاببات» دەگەن ءسوزدى ەستي تۇرسا دا، ونىڭ نە ەكەنىن ونشا تۇسىنە دە قويعان ەمەس. ومىردە ماحاببات دەگەننىڭ بار ەكەنىن ءبىلدى. ءوزى دە كەزىندە الەنكانى (قىز كۇنىندە سۇلۋ بولاتىن) سۇيگەن بولار، ءبىراق بۇل جونىندە بىردەڭە بىلەتىن ەدىم دەپ كوردى مە ەكەن، جوق. باسقالاردىڭ ماحاببات جايىندا ءان سالعانىن، كۇيىپ-جانعانىن كورگەندە، ءتىپتى سول ءۇشىن اتىسىپ تا قالادى ەكەن دەگەندى ەستىگەندە، ولار وسىنىڭ ءبارىن بىلايشا كوز الداۋ ءۇشىن جاساماي ما ەكەن دەپ تە كۇدىكتەنەتىن. كوز الداۋ بولماسا، ماحابباتتى ءسوز ەتۋ ادامداردىڭ بويىنداعى ادەت سياقتى بىردەڭە شىعار، سونان سوڭ ماحاببات جايىن اڭگىمەلەي بەرەتىن بولار دەپ تە ويلايتىن. ۇيلەنۋ، سايىپ كەلگەندە، ءبارى دە وسىعان تىرەلەدى! ال كولكا ءسۇيۋ دەگەننىڭ نە ەكەنىن بىلە مە ەكەن؟ ارينە، ول نينكاعا-سۇيكىمدى بويجەتكەنگە كوز تاستايدى. ۇيلەنەتىن ۋاقىت جەتىپ كەرنەپ اكەتىپ بارا جاتسا، ول اقىماق ءتۇن بالاسىندا تىنىم تاپپاي ساندالىپ، يتشە «ءۇرىپ» جۇرگەنى. جۇرمەسكە لاجى قايسى؟ جاس، تەپسە تەمىر ۇزگەندەي، ەجەلدەن وسىلاي بولىپ كەلەدى. ءبىر ءتاۋىرى، ايتەۋىر، بۇگىندە قىزعا تالاسىپ توبەلەسۋ جوق، بۇرىن قىرقىسىپ جاتاتىن، ماتۆەيدىڭ ءوزى دە سان رەت توبەلەسكە تۇسكەن-دى. وندا دا وسىلاي بولاتىن، قول قىشىپ، كۇش كەرنەپ بارا جاتاتىن. ول كۇشتى ءبىر جاققا جۇمساۋ كەرەك ەمەس پە.
ءبىر جولى ماتۆەي وسىلايشا ويعا شومىپ، توسەك ۇستىندە وتىرعان شاعىندا شىداي الماي ايەلىن ءتۇرتىپ قالىپ:

  -تىڭداشى... ويانساڭشى، سەنەن ءبىر نارسە سۇراعىم كەلىپ وتىر،-دەدى...

  -نە بوپ قالدى؟-دەدى الەنا تاڭىرقاپ.

  -سەندە ەرتەلى-كەش سۇيىسپەنشىلىك دەگەن بولدى ما؟ ماعان بولسىن، باسقاعا بولسىن. ءبارىبىر.

  الەنا ايران-اسىر بوپ ءبىراز جاتتى دا:

  -سەن ءوزىڭ ىشكەننەن ساۋمىسىڭ؟-دەدى.

  -قايداعى ىشكەن!.. سەن مەنى ءسۇيدىڭ بە نەمەسە بىلايشا... ادەت بويىنشا ءتيدىڭ بە؟ شىنىمەن سۇراپ وتىرمىن.

  ەرىنىڭ «جۇتپاعانىنا» الەنانىڭ كوزى جەتە تۇرا، تاعى دا ءبىرازعا دەيىن ءۇن-ءتۇنسىز جاتتى، بۇل دا بىلمەيتىن ەدى، ۇمىتسا كەرەك.

  -مۇنداي وي سەنىڭ باسىڭا نەلىكتەن كەلە قالدى؟-دەدى.

  -ءبىر نارسەنى ءتۇسىنىپ العىم كەلەدى، ءتۇبى تۇسكىردى. كوڭىلىم الدەقالاي بەيجاي. اۋىرىپ قالماسام جارار ەدى...

  -ارينە، ءسۇيدىم!-الەنا كەسىپ ايتتى،-سۇيمەسەم ساعان كەلەمىن بە. ميكا كوروليەۆ سوڭىمنان قالماي-اق باققان ەدى. وعان بارعانىم جوق. ءتۇن ورتاسىندا سۇيىسپەنشىلىك جايىن نەلىكتەن ەسكە الدىڭ؟ ويىڭدا بىردەڭە بار ما ەدى؟
 
  -كەتشى ارى!-ماتۆەي جاقتىرمادى،-ۇيىقتا.

  -ايتپاقشى، ۇمىتىپ بارادى ەكەنمىن، سيىردى تاڭەرتەڭ تابىنعا قوس، مەن ەلەڭ-الاڭدا قاتىندارمەن جيدەك تەرۋگە بارامىن.

  -قاي جاققا؟-دەدى ماتۆەي جۇلىپ العانداي.

  -سەنىڭ شابىندىعىڭا بارمايمىز، قورىقپاي-اق قوي.

  -شالعىندى جاپىرار بولساڭدار، ۇستاپ الامىن دا ون سومنان ايىپ سالامىن.

  -ءبىز ءوزىمىز بىلەمىز، شابىلمايتىن، ال جيدەگى قىپ-قىزىل بوپ تۇنىپ تۇرعان ءبىر جەر بار. سەن انا سيىردى تابىنعا قوس.

  -جارايدى.

  باسە، ىنىسىنە ءسۇت اكەلۋگە بارعان ءتۇنى نە بولعانى، سول  ءتۇننىڭ بۇگىن اياق استىنان ەسكە تۇسە قالعانى قالاي؟

  «تەگى، اقىلدان الجاسا باستاسا، كەرەك،-دەپ ويلادى ماتۆەي قامىعىپ،-قارتايا كەلە ادام الجاسادى».

  ال ىشتەگى كەسەل ايىعار  ەمەس. ول  ءتىپتى  قولىنداعى  «دارىلداعانىمەن» قوسا كولكانى كۇتىپ ەلەگىزىپ وتىراتىندى شىعاردى. كوپكە دەيىن كورىنبەي كەتسە، مازاسىزدانا باستايدى. نينكاعا ىزا بولىپ: «قۇناجىن سيىرداي بولعان نەمە! ونى وڭايلىقپەن جىبەرە قويار ما!» دەپ ءتىسىن قايرايدى.

  سولايشا كۇتۋمەن وتىرادى. شىلىم شەگەدى. شەتكەرگى ءبىر كوشەدەن گارمون داۋىسى ەستىلە باستاسا، كەسەل دە كۇشەيە قالادى. ءبىراق ءوزى ءبىر ءتۇرلى تۇسىنىكسىز، سول كەسەل قاجەت تە سياقتى. ونسىز الدەبىردەڭە جەتپەي تۇرادى.

  تاعى دا ءبىر تاڭەرتەڭگى مەزگىل ەسكە تۇسەدى... شوپتەسىن جەرمەن جالاڭ اياق كەلە جاتاسىڭ. ءشوپتى مەرۋەرتتەي شىق باسقان. سوڭىندا كوكپەڭبەك بولىپ ءىزىڭ جاتادى سايراپ. شىق قاريدى. ەسىڭە تۇسە كەتسە قازىر دە اياعىڭ مۇزداپ سالا بەرەدى.

  ءبىر مەزەت ءولىم ەسكە تۇسەدى: دەمەك، كەشىكپەي ءبارى دە بىتپەك كەرەك. قورقىنىشى دا، ۋايىمى دا جوق. ءبىراق تۇسىنىكسىز. ءبارى دە ورىن-ورنىندا بولماق.

بۇل تۇسىنىكتى، ال سەنى زيراتقا اپارادى دا كومەدى. سوندا مۇنداعىلار نە بولماق، ءبارى دە باياعى قاز-قالپىندا تۇرا بەرە مە؟! وسى جاعىن ءتۇسىنۋ قيىنىراق؟ ايتالىق، كۇن شىعادى، باتادى. ءالميساقتان بەرى شىعىپ تا، باتىپ تا كەلەدى، بۇل جاعى بەلگىلى. ال دەريەۆنياداعى ادامدار باسقا بولادى: ولاردى سەن ەش ۋاقىتتا دا تانىمايسىڭ... مۇنى ەشبىر ءتۇسىنىپ بولمايدى. ماتۆەي ريازانتسيەيەۆ دەگەن كىسى بولعانىن ولار ون-ون بەس جىلداي ەستەرىندە ساقتار، ال سونان سوڭ ءبىتتى.

  مۇنداعىلاردىڭ تىرشىلىگىن بىلگىڭ-اق كەلەدى ەمەس پە. ەشقانداي وكىنىشىڭ دە جوق سياقتى. كۇندى دە كورىپ باقتىق، مەرەكەلەردە دە سايران سالىپ، كوڭىلدى داۋرەن سۇردىك... جانە... جوق، وكىنەرلىك ەشتەڭە جوق. كوپتى كوردىك، ءبىراق ويلاپ قاراساڭ، سەن جوقسىڭ. باسقالار ورنىندا، ەندى قايتىپ كەلمەيسىڭ. قالعاندار ءۇشىن سەنىڭ ورنىڭ تولمايتىن دا شىعار. الدە ولاي ەمەس پە ەكەن؟

  «ءتفۋ!...جوق، قارتايا باستاعان ەكەنمىن». وسىنداي ويلاردان ول ابدەن شارشاپ تا بولدى.

  -ەستيمىسىڭ ەي!.. تۇر..-ماتۆەي ايەلىن وياتتى،-سەن   ولىمنەن قورقاسىڭ با؟

  -ساعان بىردەڭە كورىنگەن شىعار!-دەپ كۇڭكىلدەدى الەنا،-ونداي جالعىز كوزدى تاجالدان كىم قورىقپايتىن ەدى.

  -مەن قورىقپايمىن.

  -ولاي بولسا ۇيىقتا. ونى نەسىنە ويلايسىڭ؟

  -سەن دە ۇيىقتا!

  كوزگە تۇرتسە كورگىسىز سول ءبىر ءتۇن ات ۇستىندە قۇيعىتقان ءتۇن ەسكە تۇسكەندە جۇرەك شىمىرلاپ كەتەدى.

  سەسكەنە دە لۇپىلدەي سوعادى. جوق. تىرشىلىكتە بىردەڭە بار، الدەنە ولەردەي وكىنىشتى. ويلاساڭ كوزىڭە جاس كەلەدى.

  ءتۇنى بويى ول كولكانىڭ گارمونىنىڭ ءۇنىن ەستي الماي قويدى. وتىرىپ الىپ شىلىم شەكتى... كولكا سول كۇيى قاراسىن كورسەتپەي قويدى. اقىرى كەزدەستىرە الماي جالىقتى.

  ەلەڭ-الاڭدا ماتۆەي ايەلىن وياتتى.

  -ءبىزدىڭ ازانشىنىڭ قاراسى قايدا باتىپ كەتتى بۇل؟

  -ۇيلەندى عوي ول؟ جەكسەنبى كۇنى تويى بولادى.

  ماتۆەيدىڭ كوڭىلى جابىرقاپ قالدى. ۇيىقتاماق بولىپ جانتايعان ەدى. ۇيقىسى كەلمەدى. تاڭ اتقانشا كوز ىلمەستەن جاتتى. ءوز ومىرىنەن تاعى بىردەڭەلەردى ەسكە الماق بولعان ەدى، ءبىراق ويىنا ەشنارسە تۇسە قويمادى. تاعى كولحوز جۇمىستارى تۇس-تۇستان انتالاي قالدى... كەشىكپەي ءشوپ شابۋ باستالادى. ءشوپ شاباتىن ماشينالاردىڭ تەڭ جارتىسى ۇستا دۇكەنىنىڭ جانىندا قاڭتارۋلى تۇر. الگى سوقىر سايتان فيليا ۇستا سەرەۋن سالۋمەن ءجۇر. ەندى ول تاعى دا تويعا كەزدەسەدى، ەندەشە، ءبىر اپتا تەككە ءوتتى دەي بەر.

  « ەرتەڭ فيليامەن سويلەسۋىم كەرەك».

  ەرتەڭىنە سالپاۋىز كولكا كەزدەسكەن ەدى، ماتۆەي جىميا كۇلىپ:

  -قالاي، تۋىسقان، سايتانىڭ قاعىلدى ما؟-دەدى. كولكا دا ەزۋ تارتتى... ول كۇلە قالسا ەكى ەۋزى ەكى قۇلاعىنا جەتەتىن.

  -قويدىم، ماتۆەي يۆانچ، بۇدان بىلاي تۇندە ءسىزدى مازالامايمىن. ءبىتتى.

  -بايقا، بايقا،-ماتۆەي ءوز جايىنا كەتتى، تاعى دا: « نەسىنە جەتىسەسىڭ سەن بۇقاشىق؟ سەنى ەندى نينكا مۇيىزىڭنەن  الىپ تىرپ ەتكىزبەي قويادى. كرەچەتوۆتەر شەتىنەن سونداي كەلەتىن» دەپ ويلادى.

  ارادا ءبىر اپتا ۋاقىت ءوتتى. اي ساۋلەسى بۇرىنعىسىنشا تەرەزەگە توگىلە قالعان باقشاداعى جۋسان مەن كارتوپتىڭ بالاۋسا جاپىراعىنىڭ ءيىسى اڭقىپ تۇر. توڭىرەك قۇلاققا ۇرعان تاناداي تىم-تىرىس.

  ماتۆەي ءجوندى ۇيىقتاي المادى. وياندى، شىلىم شەكتى... كۆاس ىشپەك بولىپ سەنەككە شىقتى. باسپالداققا بارىپ وتىرىپ تاعى دا شىلىم تارتتى. دەريەۆنيا جاپ-جارىق. تىپ-تىنىش، مۇلگىپ قالعان.


شىعارمالاردى دايىنداعان – قاجىبەك ايدارحان



رەداكتورى: ارداق كامالقان قىزى
 
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.

 
powered by IlgharCMS 3.2 www.ilghar.cn