ەەڭ جاڭا مازمۇندار
2022-جىلى 7-ايدىڭ 6-كۇنى 150-سان
2022-جىلى 7-ايدىڭ 6 -كۇنى 150 ـ سان
قىزىل قايىق رۋحىن اسقاقتاتىپ، جاڭا ءداۋىردىڭ نۇر-شۇعىلاسىن ايگىلەدى
ايماعىمىز تۇڭعىش كەزەكتى كاسىپتىك شەبەرلىك باسەكەسىن وزدىردى
لي جۇڭچياڭ: ساقشىلىق ارمانىن سىندارلى ناتيجەسىمەن ۇشتاي ءتۇستى
ەرىكتى قىزمەت وتەۋ ماقساتىن ەستە بەرىك ساقتاپ، جاسىل تاۋ، تۇنىق سۋدى جانىنداي قورعادى
ايماق 4-كەزەكتى باسشى كادرلاردىڭ ەكونوميكانىڭ جوعارى ساپالى دامۋىن ىلگەرىلەتۋ قابىلەتىن، ساپاسىن جوعارىلاتۋ ارناۋلى كۋرسىن وتكىزدى
تەاتر كوركەمونەرىن ايگىلەپ، كوركەمونەر اۋىس -كۇيىسىن ىلگەرىلەتتى
قۇربان ايت مۋزيكا كەشى وتكىزىلدى
120 ءتۇرلى سالىق جيناۋ كاسىبىن شوعىرلى ۇلگىدە شينجياڭ بويىنشا ءبىر تۇتاس ءبىتىرۋ جۇزەگە استى
«شي جينپيڭ ەل باسقارۋ جونىندە» 4 - تومى شياڭگاڭدا تاراتىلدى
اۋلاسىندا ارا باعىپ اۋقاتتاندى
سۇرلەمدىك جۇگەرىگە وراق سالىندى
جەمىس جۇگەرى بازارعا سالىندى
شىعىس سولتۇستىك ازاتتىق رايونىنا اتتانۋ بۇراڭ دا شۇعىلالى ساپاردى ايگىلەدى
جاڭ يانجۇي: اۋا رايىن بارلاۋشى مامان
شيحۋ: بالىق اۋلاۋدى دانەكەر ەتىپ، اۋىل - قىستاق ساياحاتىن ىلگەرىلەتتى
ايماقتىق حالىق قۇرىلتايى قىزمەت كوميتەتى 2022 -جىلعى 2 -رەتكى ءماجىلىسىن اشتى
تارباعاتاي ايماعى 2 - توپتاعى ساۋداگەر شاقىرىپ، قارجى ەنگىزۋ نىساندارىنا شوعىرلى قول قويۋ جانە الدىڭعى جارىم جىلداعى ساۋداگەر شاقىرىپ، قارجى ەنگىزۋ قىزمەتىن قورىتىندىلاۋ ءماجىلىسىن اشتى
2022-جىلى 7-ايدىڭ 5 -كۇنى 149 ـ سان
”ءبىر ەل، ەكى ءتۇزىم“ − جاقسى ءتۇزىم، وعان، ءسوز جوق، ۇزاق ۋاقىت تاباندى بولۋ كەرەك
العىس جىرىن پارتياعا ارنادى
”ياۋجانزىنى تانىستىرۋشىنىڭ“ ەستەلىگى
اۆتونوميالى رايوننىڭ پارتيا، ۇكىمەت ۋاكىلدەر ۇيىرمەسى حىبەيدا ۇيرەنۋدە، تەكسەرۋدە بولدى
تيانشان الابى جاراسىمدىلىق كارتيناسىمەن كەستەلەندى
پارتيانىڭ 100 جىلدىق كۇرەسىنىڭ تاريحي تاجىريبەلەرىن اناعۇرلىم ويداعىداي يگەرۋ جانە قولدانۋ كەرەك
شي جينپيڭ شياڭگاڭ عىلىم باقشاسىندا قىزمەت تەكسەردى
شياڭگاڭ وتان قۇشاعىنا ورالعاندىعىنىڭ 25 جىلدىعىن قۇتتىقتاۋ جينالىسى جانە شياڭگاڭ ەرەكشە اكىمشىلىك رايونى 6 - كەزەكتى ۇكىمەتىنىڭ مىندەتكە وتىرۋ سالتى سالتاناتپەن وتكىزىلدى
شي جينپيڭ شياڭگاڭعا باردى
2022-جىلى 7-ايدىڭ 4 -كۇنى 148 ـ سان

كۇن،شال جانە قىز

جولدانعان ۋاقىتى : 2014/12/29 11:24:22

ۆاسيلي شۋكشين   (رەسەي)


كۇن دەگەنىڭىز ناعىز مي قايناتار ىستىق ەدى. جەر دە،   اعاشتار دا كۇيىپ تۇر. ءشوپ بىتكەن قۋراپ كەتكەن، اياق باسساڭ سىتىر-سىتىر ەتەدى.

ناق وسىنداي شاقتا دا قاۋساعان كارى شال اعىنى قاتتى كاتۋنا وزەنىنىڭ جاعاسىنا شىعىپ، ءارقاشان ءبىر جەرگە – قۋراپ-سىنىپ وزەنگە قۇلاپ جاتقان اعاشتىڭ جانىنا كەلىپ، كۇنگە قاراپ وتىراتىن دا قوياتىن.

مۇندا تەك كەشكە قاراي عانا سالقىن تۇسە باستايدى.

كۇن تاۋدان اسا قۇلاعان شاقتا ول قىزارىپ، ۇلكەيىپ كەتكەن.

شال سەلت ەتپەستەن وتىر. موينى شيدەي، اپپاق قۋداي باسى شاقشاداي. سيديعان سۇيەكتەرى كوكشىل شىت كويلەكتىڭ استىندا مەنمۇندالاپ شودىرايىپ تۇر.

وسىلايشا وتىرعان شال ءبىر جولى تۋ سىرتىنان:

-سالەمەتسىز بە، اتا!-دەگەن داۋىستى ەستىدى.

شال باسىن يزەدى:

قولىندا شاعىن عانا چەمودانى بار ءبىر قىز ونىڭ جانىنا كەلىپ وتىردى.

-دەم الىپ وتىرسىز با؟

شال تاعى دا باسىن يزەپ:

-ءيا،-دەدى.

قىزعا بۇرىلىپ قاراعان شال جوق.

-مەن ءسىزدى قاعازعا ءتۇسىرىپ الايىن دەگەن ەدىم، رۇقسات پا؟-دەدى قىز.

-ول نە ءۇشىن؟-شال تۇسىنبەدى.

-سۋرەتىڭىزدى سالامىن.

شال از ۋاقىت ءۇنسىز كۇنگە قارادى، كىرپىكسىز قىزىل قاباعىن قاعىپ-قاعىپ قويدى.

-قازىر مەندە نە سيىق قالدى دەيسىڭ، شىراعىم،-دەدى.

ول:

-نەگە؟-قىز ءبىرشاما قىسىلىپ قالدى.-جوق، ءسىز   ادەمىسىز، اتا.

-ونىڭ ۇستىنە اۋىرامىن.

قىز كوپكە دەيىن شالدان كوز المادى. سونان سوڭ جۇمساق  الاقانىمەن شالدىڭ تارامىس قولىن سيپاپ:

-ءسىز وتە ادەمىسىز، اتا،-دەدى،-شىن ادەمىسىز.

شال باياۋ عانا ەزۋ تارتتى.

-ولاي بولسا سۋرەتىڭە سالا بەر.

قىز چەمودانىن اشتى.

شال قولىن اۋزىنا توسىپ، ءبىر جوتكىرىنىپ الدى.

-قالادانسىڭ با؟-دەپ سۇرادى ول قىزدان.

-ءيا.

-بۇل جۇمىسڭا اقى تولەيتىن بولار؟

-ءارقالاي. جاقسى جاساپ شىعارسام تولەيدى.

-سوعان ۇمتىلۋ كەرەك.

-ايانىپ قالمايمىن عوي،- تىم-تىرس.

شال سو بەتى كۇنگە قاراپ قالعان. قىز قىرىن قاراپ وتىرعان شالدىڭ بەتىنە ءالسىن-ءالى قاراپ، سۋرەتىن سالدى.

-ءسىز وسى جەردەنسىز عوي، اتا؟

-وسى جەردەنمىن...

-وسىندا تۋىپ-وسكەنسىز بە؟

-وسىندا عوي، وسىندا.

-ءسىز قازىر نەشەدەسىز؟

-جاسىمدى ايتاسىڭ با؟ سەكسەندەمىن.

-ەھە-ە!

-ءيا، از ەمەس،-دەپ قوستادى قاريا، تاعى دا ءسال عانا ەزۋ تارتتى،-ءوزىڭ شە؟

-جيىرما بەستەمىن،-تاعى دا ۇنسىزدىك ورنادى.

-كۇندى كورمەيسىڭ بە، قانداي!-دەدى شال سۇقتانعانداي بولىپ.

-قانداي؟-قىز تۇسىنبەدى.

-ۇلكەن.

-ءيا… سولاي. بۇل وتە ءبىر قىزىقتى جەر ەكەن.

-سوناۋ سۋدى كوردىڭ بە، قانداي... ارعى قاباقتاعىنى ايتامىن...
-ءيا، ءيا.

-بەينە ءبىر قانتالاپ تۇرعانداي.

-سولاي،-قىز ارعى جاعالاۋعا كوز جىبەردى.

-ءيا.

كۇن التايدىڭ شوقتىعىنا   ىلىنگەن سوڭ، بىرتە-بىرتە كوز ۇشىنداعى كوگىلدىر مۇنار قۇشاعىنا ەنە بەردى.

كۇن الىستاعان سايىن تاۋ دا ايقىن كورىنە باستادى. ال     ويپاتتا-وزەن مەن تاۋ ارالىعىندا قىزعىلت اراي بىرتە-بىرتە سونە باستاعان. تاۋدان تونگەن قوڭىرقاي كولەڭكە تومەنگە باياۋ عانا جايىلىپ كەلە جاتتى.
كۇن بۋبۋرحاننىڭ قىر جوتاسىنان ارى اسىپ كورىنبەي كەتكەن ەدى، سول-اق ەكەن، كوگىلدىر كوك اسپان الەمىنە اشىق كۇرەڭ شاپاق دەستەسى شارق ۇرىپ شىعا كەلدى.

بۇل دا كوپ بايىزداعان جوق. شىم-شىمداي بارىپ باتتى. ال اسپاننىڭ سول تۇسىنان كەشكى اراي كولبەڭدەي كورىنىس بەرە قالدى.

-كۇن باتتى،-دەپ كۇرسىندى شال. قىز قاعازدارىن جاشىگىنە سالدى. از ۋاقىتقا سوزىلعان جاي وتىرىستا ەكەۋى جاعاداعى مايدا تولقىننىڭ سىبدىرىن تىڭدادى. شاتقالعا بۋداق-بۋداق تۇمان   ءتۇسىپ كەلەدى.

سول ماڭايداعى ءيىرىم توعايدا الدەبىر تۇنگى قۇس ءالجۋاز دىبىس بەرگەن ەدى. بۇعان ارعى بەتتەگى جاعالاۋدىڭ قۇستارى   ادەمى ءۇن قاتتى.

-قانداي تاماشا!-دەدى شال باياۋ عانا.

ال قىز بولسا شالعايداعى سۇيىكتى قالاسىنا كەشىكپەي قايتۋدى، وندا كوپتەگەن سۋرەتتەر اپارۋدى ويلايدى. ول سۋرەتتەرگە شالدىڭ سۋرەتى دە قوسىلادى. ال مۇنىڭ ونداعى دوسى، تالانتتى شىن سۋرەتشىنىڭ: « تاعى دا قاپتاعان اجىم!.. بۇل نەگە كەرەك؟ ءسىبىردىڭ اۋا رايىنىڭ سۋىق ەكەنى، ونداعىلاردىڭ   جۇمىس باستى ەكەنى كىمگە دە بولسا بەلگىلى ەمەس پە؟ باسقا نە بار مۇندا؟ بۇل نە ءوزى؟» دەپ رەنىش ءبىلدىرۋى ءسوزسىز.

قىز ءوزىنىڭ دارىندىلىعىن ءبىر قۇداي بىلمەسە، باسقا ەشكىمنىڭ بىلمەيتىنىن سەزەدى. ءبىراق مىنا شالدىڭ باسىنان قانداي قيىن ءومىر وتكەرىلگەنىن ويلادى. قولدارى قانداي... ونى دا اجىم باسقان؟ «دامىل تاپپاي جۇمىس ىستەۋ كەرەك بولعان عوي»...

-ءسىز مۇندا ەرتەڭ كەلەسىز بە، اتا؟-دەدى.

-كەلەمىن عوي،-دەپ جاۋاپ بەردى شال.

قىز ورنىنان تۇردى دا اۋىلعا قاراي بەت الدى.

ءسال-ءپال وتىردى دا، شال دا كەتتى.

ول ۇيىنە كەلىپ، پەش تۇبىندەگى ءوزىنىڭ ورنىنا وتىردى، تىرپ ەتپەستەن بالاسىنىڭ جۇمىستان كەلۋىن، كەشكى تاماقتى ىشۋگە وتىرۋ ءساتىن كۇتتى.

بالاسى جۇمىستان ىلعي شارشاپ-شالدىعىپ، رەنىشپەن كەلەدى. كەلىنىنىڭ الدەبىردەڭەگە كەيىمەي جۇرەتىن كەزى كەمدە -كەم. نەمەرەلەرى ەرجەتكەن، قالادا تۇرادى. ولارسىز ءۇي ءىشى قاشاندا سۋ سەپكەندەي كوڭىلسىز.

كەشكى تاماقتى ىشۋگە     وتىردى.

شالعا سۇتكە نان تۋراپ بەرگەن ەدى. ۇستەل شەتىندە وتىرىپ سوعان الداندى. قاسىعى مەن تارەلەكەنى تاقىلداتپاي، ساقتانىپ ەشبىر دىبىس شىعارماۋعا تىرىسادى. تىم-تىرس.

بۇدان سوڭ ءبارى دە ۇيقىعا جاتتى.

شال پەش ۇستىنە جايعاسىپ، بالاسى مەن كەلىنى تورگى بولمەگە كەتتى. ءبارى دە ءۇن-ءتۇنسىز. ءسوز ەتەرلىك نە ءسوز بار؟ ءبارى دە الدەقاشان ايتىلىپ  بولعان.

كەلەسى كۇنى كەشكىسىن قىز بەن شال تاعى دا وزەن جاعاسىندا وتىردى. قىز اپىل-عۇپىل سۋرەت سالىپ، ال شال كۇنگە قاراپ  وتىرىپ اڭگىمە قوزعادى:

-تۇرمىسىمىز ءارقاشاندا جاقسى بولعان ەدى، وبالى كانە. مەن بالتاشى ەدىم، جۇمىس باستان اساتىن. بالالارىم دا شەتىنەن بالتاشى. سوعىستا تورتەۋى وپات بولىپ كەتتى. ەكەۋى ءتىرى قالدى. سولاردىڭ ءبىرى، ستەپانمەن بىرگە تۇرىپ جاتىرمىن. ال ۆانكا بييسكى قالاسىندا. جاڭا  قۇرىلىستا پروراپ بولىپ ىستەيدى. حات جازىپ تۇرادى، تۇرمىسى جامان ەمەس، جاقسى،     وسىندا قىدىرىپ كەلىپ تە  كەتكەن-دى.

نەمەرەلەرىم كوپ. بۇگىندە  ءبارى دە ءار قالاعا تاراپ كەتىپ قالعان...

قىز شالدىڭ قولىن سۋرەتكە سالىپ جاتقان ەدى. اسىپ-ساسىپ، كەيىپ، قايتا-قايتا     وشىرۋمەن بولدى.

-تۇرمىستارىڭىز اۋىر بولعان ەكەن عوي،-دەپ قالدى قىز جازا باسىپ.

-قالايشا اۋىر بولادى؟-دەپ شال تاڭىرقادى،-مەن ساعان تۇرمىسىمىز جاقسى بولعان ەدى دەدىم عوي، الگىندە.

-بالالارىڭىزدىڭ قايتىس  بولعانى سىزگە قاتتى باتقان بولار؟

-ەندى قالاي؟-شال تاعى دا تاڭىرقادى،- ءتورت بىردەي بوزداق جۋساپ قالسا، وڭاي ما؟

شالدى سونشالىقتى قاتتى  ايادى ما، ونىڭ سابىرلىلىعىنا، كونپىستىگىنە مەيلىنشە قايران قالدى ما؟ قىزدىڭ ءوزى دە وسىنىڭ بايبىنا بارا الماي وتىر.

كۇن تاعى دا تاۋدان اسىپ  بارادى. تاعى دا قىزعىلت شاپاق جانا قالدى.

-ەرتەڭ كۇن جاۋىن-شاشىندى بولادى،-دەدى شال. قىز بۇلتسىز اشىق اسپانعا قارادى.

-نەلىكتەن ولاي دەدىڭىز؟

-تۇلا بويىم قۇرىسىپ وتىر.

-اسپان شايداي اشىق قوي.

شال ۇندەمەدى.

-ەرتەڭ مۇندا كەلەسىز بە، اتا؟

-قايدام،-شال سوزالاڭ جاۋاپ بەردى،-ونە بويىم قوزعالتپايدى.

-اتا، مىنا سياقتى تاستى سىزدەر نەندەي تاس دەپ اتايسىزدار؟-قىز بەشپەتىنىڭ قالتاسىنان سارعىش تاستى الىپ كورسەتتى:

-كانە، قانداي؟-دەپ سۇرادى شال تاۋ جاققا قاراي وتىرىپ.

قىز قولىنداعى تاستى ۇسىنعاندا، شال وعان بۇرىلىپ قاراماستان الاقانىن جايدى.

-مىناۋ ما؟-دەپ سۇرادى ول تاسقا ءجۇردىم-باردىم كوز جۇگىرتكەندەي بولىپ، ءسويتتى دە ونى ساۋدىراعان ساۋساقتارىمەن ارلى-بەرلى اۋناتىپ تەكسەرە باستادى،-بۇل وتتىق تاس. سوعىس كەزىندە سىرىڭكە جوقتا جۇرت وسىمەن وت تۇتاتقان.

وسى ارادا قىز مىناداي توسىن ويعا تاپ بولدى: شال وعان ەكى كوزى جوق سوقىر سياقتى بولىپ كورىندى. ول بىردەن نە ايتارىن بىلمەي، ءۇنسىز عانا قىرىن وتىرعان شالعا قارادى. ال شالدىڭ ەكى كوزى باتقان كۇندە. سابىرلى، ويلى پىشىنىنەن تايانار ەمەس.

-ءما... مىنا تاسىڭدى ەندى ءوزىڭ ال،-دەپ ول تاستى قىزعا ۇسىندى،- بۇل تاستار ءار قيلى بولىپ كەلەدى. ار جاعىنان كۇن كورىنەتىن اپپاعى، ىشىندە بولماشى داقتارى بارى دا كەزدەسەدى. جۇمىرتقادان اجىراتقىسىز جۇپ-جۇمىرلارى دا بار. بۇيىرلەرى شۇبار كادىمگى ساۋىسقاننىڭ جۇمىرتقاسىنا ۇقساستارى دا، سونداي-اق قارا تورعايدىڭ جۇمىرتقاسى سياقتى كوك، شۇبار تۇستىلەرى دە كەزدەسەدى.

قىز شالدان كوز الار ەمەس. ءسىز وسى سوقىر ەمەسسىز بە دەپ سۇراۋعا باتىلى بارمادى.

-اتا، ءسىز قاي تۇستا تۇراسىز؟

-وسى ارادان ونشا الىس    ەمەس. اناۋ يۆان كولوكولنيكوۆتىڭ ءۇيى،-شال وزەن جاعاسىنداعى ءۇيدى نۇسقادى،- ودان سوڭ بەداروۆتار، ودان سوڭ ۆولوكيتيندەر، ودان سوڭ زينوۆيەۆتەر، سودان ارعى مۇيىستە   ءبىزدىڭ ءۇي بار.

ءبىر نارسە قاجەت بولسا، كەل. نەمەرەلەر باردا ءۇيىمىز بازار   بولىپ تۇرار ەدى.

-راقىمەت.

-مەن كەتتىم. تۇلا بويىم قاقساپ بارادى.

شال ورنىنان تۇرىپ، جالعىز اياق جولعا ءتۇستى دە تاۋعا قاراي بەتتەدى.

ول قاشان كوشەنىڭ مۇيىسىنە جەتىپ بۇرىلعانشا قىز ودان كوز الماي قارادى دا تۇردى. شال بىردە-ءبىر رەت سۇرىنگەن دە، كىدىرگەن دە جوق. ءىلبي باسىپ، اياعىنىڭ استىنا قاراپ كەتىپ بارا جاتتى.

«جوق، سوقىر ەمەس ەكەن،-دەپ ويلادى قىز،-كوزى ناشار كورەتىن بولسا كەرەك».

كەلەسى كۇنى شال وزەن جاعاسىنا كەلمەدى.

قىز جاپادان-جالعىز وتىرىپ شالدى ويلادى. ونىڭ ومىرىندە كادىمگىدەي، جاي عانا، ءتىپتى جاي دا ەمەس، الدەبىر ەرەكشە ۇلكەن سىر جاتقانداي كورىندى بۇعان. «كۇن دە ادەتتەگىدەي جايىمەن اتادى، باتادى،-دەپ ويلادى قىز،- ال وسى جايدان جاي ما ەكەن!» وسىدان سوڭ ول   ءوزىنىڭ سالعان سۋرەتتەرىنە زەيىن قويىپ قارادى. كوڭىلى جابىرقاۋ تارتا باستادى.

شال ءۇشىنشى كۇنى دە، ءتورتىنشى كۇنى دە كەلمەدى.

قىز شالدىڭ ءۇيىن ىزدەپ شىقتى.

تاپتى.

تەمىر شاتىرلى، داعارداي اعاش ءۇيدىڭ اۋلاسى ىشىندە، بۇرىشتاعى جاپپا استىندا جاسى ەلۋلەر شاماسىنداعى بىرەۋ قوندىرعى ۇستىندە تاقتاي سۇرگىلەپ جاتىر.

-سالەمەتسىز بە؟-دەدى قىز.

بەيتانىس ادام بويىن تۇزەپ، قىزعا قارادى، تەرلەگەن ماڭدايىن بارماعىمەن سىپىرا بەرىپ باسىن يزەدى:

-سالەمەت پە.

-ايتىڭىزشى، اتاي وسىندا تۇرا ما؟..

الگى كىسى قىزعا باجايلاپ، ونىڭ ۇستىنە سەكەم الا قارادى، قىز ۇندەگەن جوق.

-وسىندا تۇرعان بولاتىن،-دەدى ءۇي يەسى،-كورىپ تۇرسىڭ با، سونىڭ تابىتىن جاساپ جاتىرمىن.

قىز اڭىرىپ تۇرىپ قالدى.

-نە دەدىڭىز، ءولىپ قالدى ما؟

-قايتىس بولدى،-ول الدىنداعى تاقتايدى سۇرگىمەن بىرەر رەت جۇرگىزىپ الىپ، سونان سوڭ تاعى دا قىزعا قارادى،- نەندەي شارۋاڭ بار ەدى؟

-مەن ول كىسىنىڭ سۋرەتىن سالعانمىن.

-سولاي دە...-ول الدىنداعى تاقتايدى سۇرگىمەن سىرىلداتا تارتىپ-تارتىپ قالدى.

-ول كىسى سوقىر ما ەدى؟-دەپ سۇرادى قىز ءبىراز ۋاقىتتان سوڭ.

-سوقىر بولاتىن.

-كوپتەن بەرى مە؟

-ون جىلداي بولعان شىعار. نەگە سۇرادىڭ؟

-جاي انشەيىن.

قىز اۋلادان شىعىپ جۇرە بەردى.

سىرتقا شىعىسىمەن شارباققا سۇيەنىپ تۇرىپ جىلاپ جىبەردى. قارياعا جانى اشىپ كەتتى. ونىمەن اڭگىمەلەسە الماي قالعانىنا وكىندى. ءبىراق ول قازىر ادام ءومىرىنىڭ، ونىڭ ەرلىگىنىڭ الدەبىر تەرەڭ ماعىناسى مەن سىرىن تۇسىنە باستاعانداي. سونداي-اق، نەلىكتەن ەكەنىنىڭ بايبىنا بارا قويماعانىمەن، ءوز باسىنىڭ دا الدەقايدا ەستيار تارتىپ قالعانىن سەزىنگەندەي ەدى.

دايىنداعان-قاجىبەك ايدارحان



رەداكتورى: ارداق كامالقان قىزى
 
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.

 
powered by IlgharCMS 3.2 www.ilghar.cn