شيپاحانا بولمەسىنە ەكى سالماقتى ناۋقاس ورنالاسقان، توسەگى ناۋقاس بولمەسىنىڭ تەرەزەسى الدىنا قويىلعان ناۋقاس ءار كۇنى تۇستەن كەيىن توسەكتىڭ ۇستىندە ءبىر ساعاتتاي باسىن كوتەرىپ وتىرىپ، وكپەسىندەگى ەمۋلسيانى شىعارادى.
ال ەندى بىرەۋى كۇن بويى توسەكتەن باسىن كوتەرمەيدى، ولار ۋاقىت وتكىزۋ ءۇشىن تاڭ اتىسىمەن وزدەرىنىڭ جولداستارىن، وتباسىن، تۇرار-جايلارىن، قىزمەتتەرىن، بۇرىن بارىپ دەم العان جەرلەرى مەن اسكەرلىك مىندەت وتەگەن جاعدايلارىن ايتىسىپ، ەكى كوزگە ۇيقى تىعىلعانشا اڭگىمە سوعاتىن.
ءار كۇنى تۇستەن كەيىن تەرەزە جانىندا جاتقان ناۋقاس باسىن كوتەرگەندە، ولاردىڭ اڭگىمەلەرى قىزا تۇسەتىن، تەرەزە جانىندا جاتقان ناۋقاس باسىن كوتەرىپ وتىرعان سوڭ، قاسىندا جاتقان ناۋقاسقا تەرەزە سىرتىنان كورگەندەرىن تەبىرەنە، ءسوزدىڭ مايىن تامىزا ايتىپ بەرەدى.
تەرەزەنىڭ الدىندا وتىرىپ، سىرتتاعى كولدى، كول بەتىندە قالىقتاي جۇزگەن ۇيرەكتەر مەن اققۋدى، قاعاز كەمە جاساپ ويناپ جۇرگەن بالالاردى، قول ۇستاسا سەيىلدەپ جۇرگەن عاشىقتاردى، الۋان ءتۇرلى اسەم گۇلدەردى، ماۋەلەي وسكەن ەجەلگى اعاشتاردى، الىستان نۇرىن شاشا بۇلدىراي كورىنگەن قالانىڭ سۇلۋ كەلبەتىن كورۋگە بولادى.
تەرەزە جانىنداعى ناۋقاس بۇل كورىنىستەردى اسەرلەنە اڭگىمە ەتكەندە، ورنىنان تۇرا المايتىن ناۋقاس كوزىن ۇزاق جۇمىپ، الگىندەگى اسەم كورىنىستەردى قيال ەلەگىنەن وتكىزىپ جاتۋشى ەدى.
جايدارلى ءبىر ءتۇس اۋعان مەزگىل بولاتىن. تەرەزە جانىنداعى ناۋقاس تەرەزەدەن ءبىر وركەستردى كورىپ وتىرعانىن اڭگىمە ەتتى. الايدا، توسەكتەن باسىن كوتەرە المايتىن ناۋقاس، ەشقانداي مۋزيكا دىبىسىن ەستي المادى، تەرەزە جانىنداعى ناۋقاس بۇرىنعىداي قۇلاقتىڭ قۇرىشىن قاندىرا، قيالىندا كورگەن ساۋلەتتى مۋزيكا كەشىن اڭگىمەلەدى.
وسىلايشا، كۇندەر كۇلىپ، ايلار جىلجىپ ءوتىپ جاتتى.
ءبىر كۇنى تاڭەرتەڭ كەزەكشى سەستىرا ولار جۋىناتىن سۋدى الىپ كەلگەندە، تەرەزە جانىندا جاتقان ناۋقاستىڭ ماڭگىلىك ۇيقىعا كەتىپ، بۇل دۇنيەگە قوش ايتقانىن بايقادى. قاسىرەتكە باتقان سەستىرا شيپاحانانىڭ قىزمەت وتەۋشىلەرىنە ونى الىپ كەتۋدى ۇقتىرادى. وسىلايشا، ءمورتىن كۇتىپ جاتقان، توسەكتەن باسىن كوتەرە المايتىن ناۋقاس سەستىراعا ءوزىن تەرەزە جانىنداعى توسەككە اۋىستىرۋىن تالاپ ەتەدى. سەستىرا ناۋقاستى تالاپ ەتكەن جەرىنە ورنالاستىرىپ بولعان سوڭ، ناۋقاس بولمەسىنەن شىعىپ كەتەدى.
سودان توسەكتەن باسىن كوتەرە المايتىن ناۋقاس بار كۇشىن سالىپ قينالا، شىنتاقتاپ تەرەزەدەن قاراپ، ءوزىنىڭ قيالىندا جۇرگەن، تەرەزە جانىندا جاتقان ناۋقاستىڭ ەلىتە، ەلىكتىرە سۋرەتتەيتىن سىرتقى دۇنيەسىن ءوز كوزىمەن كورۋ ورايىنا يە بولدى.
اقىرىن-اقىرىن جىلجىپ، تەرەزەگە جاقىنداپ، سىرتقا قارادى. الايدا، ونىڭ كوزىنە قۇلاعالى تۇرعان، توزىعى جەتكەن داۋالدان باسقا ەشتەمە شالىنبادى، سودان ول سەستىرادان:
-تەرەزە جانىندا جاتقان ناۋقاس تەرەزەنىڭ سىرتىنداعى بارلىق كورىنىستى مايىن تامىزا اڭگىمەلەۋشى ەدى، ال مەن قالايشا ەشتەڭەنى كورە المايمىن،-دەپ سۇرادى.
-وعان سەستىرا:
-تەرەزە جانىندا جاتقان ناۋقاس شىن سوقىر، ول سىرتقى كورىنىستى قويىپ، شيپاحانانىڭ قابىرعا داۋالىن دا كورە المايدى.بالكىم، ءسىزدى شابىتتاندىرعانى بولسا كەرەك،-دەدى.
اۋدارعان - امان مەللات ۇلى
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.