سەرىك سابىر ۇلى
تاپقان -تەرگەن تەڭگەنىڭ باسىن قۇراپ، ءوز الدىنا كاسىپ كوزىن اشىپ، يگىلىك جاراتۋ ماقساتىندا جار قۇلاعى جاستىققا تيمەي، ىزدەنىپ، ەڭبەكتەنىپ جۇرگەن ەركەنىڭ ( جاناما ەسىم ) جىلقى جىلىن امان - ەسەن اتتاندىرىپ، قوي جىلىن كۇتىپ العان جاڭا جىلدا الدامكوستەردىڭ تۇزاعىنا ءىلىنىپ، جيعان-تەرگەن 10 مىڭ يۋان اقشاسىنان ايىرىلىپ وپىق جەپ قالارى ءۇش ۇيىقتاسا تۇسىنە دە كىرىپ شىقپاعان-دى.
ەركە جوعارى مەكتەپتى ءبىتىرىپ قوعام تابالدىرىعىن اتتاعان سوڭ، بىرەر مەكەمەنىڭ تۇراقتى قىزمەتكەرى بولۋ ءۇشىن بارىنشا ىزدەندى، وقىعان كاسىبى سەستىرالىق بولعاندىقتان، العاشىندا ءمالىم اۋدانداعى شيپاحانادان وزىنە ءتيىستى ورنىن تاۋىپ، كوكەيگە بۇككەن اسىل ارمانىن ەرتە جۇزەگە اسىرۋ ءۇشىن، جۇمىستىڭ قيىندىعىنا ءتوزىپ، بارىنشا قۇلشىندى. الايدا تاپقانى ماردىمدى بولماعاندىقتان، قالاعا بەت الىپ الدىمەن بىرەر جۇمىس ورنىن تاۋىپ، ودان كەيىن ءوز الدىنا كاسىپتەنۋ ءۇشىن ىزدەنۋدى ءجون كورىپ، توقتامدى جۇمىستان قول ءۇزدى.
ۆ2014-جىلى قازاندا قۇلجا قالاسىنا كەلىپ، قالاداعى بەلگىلى ىقپالدى شيپاحانادان توقتامدى جۇمىس تابادى. 2015-جىلى قاڭتاردىڭ ءمالىم ءبىر كۇنى ول قولفوندا قارىز اقشا الاسىز با؟ سەرىكتىگىمىزدىڭ قۇلجا قالاسىنداعى بولىمشەسى سىزگە قولايلى قىزمەت وتەيدى، كەپىلدىك اقشانى تاپسىرساڭىز بولدى... دەگەن ەستىر قۇلاققا جەڭىل دە جاعىمدى جارناما ۇرانى نازارىن بىردەن باۋراپ كەتەدى. باسىندا قويشى، قايداعى ونداي وڭاي دا قويلايلى شارۋا بولسىن، ەلدەن قارىزعا اقشا الۋ وڭاي ما؟ سەنىمدى ەمەس شىعار دەگەن وي كەلسە دە، ءوز الدىندا كاسىپتەنۋ ويىندا جۇرگەن وعان بۇل ءبىر تاپتىرماس وراي بولىپ سەزىلە بەرەدى. سونىمەن قارسى جاققا قالاي تەلەفون ۇرعانىن دا سەزبەي قالادى. تەلەفوندى قويعان ەركە سەنەرىن دە، سەنبەسىن دە بىلە المادى. ءبىر ويلاسا تاماشا ءبىر ورايعا كەز بولىپ تۇر، ەندى ءبىر ويلاسا، وزىندە تۇراقتى كاسىپ بولماعاندىقتان، بانكەدەن قارىز الۋ راسىمياتىن ءبىتىرۋدىڭ قيىندىعى جاتىر، تاعى ءبىر جاعى ول قۇلجا قالاسىنىڭ ادام اياعى ۇزىلمەيتىن، وتە-موتە، جاستار جاعى كوپ باراتىن بەلگىلى كوڭىل اشۋ ورنىن مايعا الىپ، ءوز الدىنا كاسىپ باستاۋ ماقساتىندا قوجايىنمەن كەلىسىپ، مىڭ يۋان كەپىلدىك اقشا بەرىپ قويعان بولاتىن، كوڭىل اشۋ ورنى قوجايىننىڭ مەرزىمدى ۋاقىتتا مايعا الۋ اقىسىن تاپسىر، تاپسىرا الماساڭ باسقالارعا مايعا بەرەمىن، ماعان دا اقشا قاجەت بولىپ تۇر دەگەنى ەسىنە ورالادى.
وي سوقتى بولعان ەركە ەرتەسى بۇل ورايدى قامتىپ قالعانىم دۇرىس، مۇنداي كوپ اقشانى كىم ماعان قارىزعا بەرە قويار دەپ ويلايدى دا قارسى جاققا تەلەفون شالىپ، ولاردان كارتۋچكا ءنومىرىن تاپسىرىپ العان سوڭ، سەرىكتىك قىزمەتكەرىنىڭ ايتقانى بويىنشا ۋادەلى ۋاعىندا قارسى جاققا ون مىڭ يۋان كەپىلدىك اقشانى سالىپ جىبەرەدى. بەلگىلى ۋاقىتتا تەلەفون شالىپ حابارلايمىز دەگەن كەلىسىم بويىنشا قارسى جاققا تەلەفون شالادى، ءبىراق بايلانىس تەلەفونى بۇرىنعىداي ەمەس، جوق ءنومىر بولىپ جالعانبايدى. سوندا بارىپ ول ءوزىنىڭ الدامكوستەردىڭ تۇزاعىنا ءتۇسىپ قالعانىن، مىڭ ءبىر جاپامەن جيعان اقشاسىن الدامكوسكە بوسقا بەرە سالعانىن بىلەدى ...
« ساقتانساڭ، ساقتايدى » دەمەكشى، تەگىن ولجانى، ارام پايدانى عانا كوزدەگەن ايلاكەر الدامكوستەر اككىلىگىن اسىرىپ، قاقپان تۇزاعىن كاسىپ كۇتكەن ستۋدەنتتەرگە، بالاسىن كاسىپتەندىرمەكشى بولعاندارعا، قارىز اقشاعا قاجەتى تۇسكەندەرگە، جاڭا تەحنيكا تەتىگىن يگەرە الماعان قارتتارعا نەمەسە باعىن باسەكەدەن سىناۋ ماقساتىندا ءتۇرلى ەمتيحان تاپسىرعان وقۋشىلارعا قۇرىپ وتىرعانىن احپارات مەديالارىنان ەستىپ تە، كورىپ تە ءجۇرمىز. ەركە سەكىلدى قوعام تابالدىرىعىن ەندى اتتاعان ستۋدەنتتەرگە جانە قالا جاعالاپ قارا جۇمىس ىزدەپ جۇرگەن قانداستارىمىزعا ەسكەرتەرىمىز، مەزەتتىك كاسىپتەنە الماۋعا بولا اڭقاۋلىق پەن الاڭعاسارلىققا سالىنباي، الدىمەن ءوزىن دۇرىس مەجەلەپ، جالپى ساپاسىن سومداپ، سۇرانىس پەن تالاپتى قاناعاتتاندىرا الاتىن ونەر مەن تەحينكا تەتىگىن تولىق يگەرىپ، بۇيىرعان وراي مەن باقتان سالىمىن سىناپ كورۋدەن قاشاندا جالىقپاۋىن، قارا جۇمىستى قولعا العاندا قارسى جاقپەن اۋىزشا ەمەس جازباشا كەلىسىمگە وتىرۋدى، ازاماتتىق كۋالىگىن دۇرىس پايدالانىپ، كىم كورىنگەنگە ۇستاتا سالماۋدى، زاڭدىق مۇددەسىن قورعاي ءبىلۋدى ءۇمىت ەتەمىز. ەسىڭىزدە بولسىن، دۇنيەدە وڭاي ولجا كەزىگە بەرمەيدى، وڭاي ولجا ىزدەپ، دالباسا ۇمىتكە الدانباڭىز، الدامكوستىڭ ايلاسى كوپ، ساق بولىڭىز.
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.