«مارجان قىز»

ماقسات قيزات ۇلى
 

   قولونەردىڭ سان ءتۇرىن كورىپ    ءجۇرمىز،  بىرەۋى  اعاشتان  ءتۇيىن  ءتۇيىپ استاۋ-شەلەك جاساسا، بىرەۋى قۋ ءمۇيىزدى دە قازىناعا  اينالدىرىپ، ودان  تۇتىنۋ بۇيىمدارىن جاساپ تابىس كوزىن تاۋىپ، تىرلىگىن  تىڭايتىپ وتىر. ال كادىمگى جاسىل، قىزىل مارجانداردىڭ قاتتىسىن دا، جۇمساعىن دا ورنىمەن ءتىزىپ ورنەكتەپ، اشەكەي بۇيىم جاساعان جاندى كوپ كەزدەستىرىپ كورمەگەن ەدىك. «ەل ءىشى ونەر كەنىشى» دەگەن  ءسوزدىڭ  جانى بار ەكەن، ءدوربىلجىن اۋدانىنىڭ ەمىل مال فەرماسىنا بارعانىمىزدا سول جەردەن كوز مايىن تاۋىسىپ، مىڭ، ميلليون مارجاننىڭ قالاۋلىسىن تاڭداپ الىپ،    ونىسىمەن كوزگە ىستىق، كوڭىلگە قونىمدى تۇرمىستىق بۇيىمدار جاساپ وتىرعان قازاقتىڭ قارا تورى قىزىنا كەزىكتىك.

  تۇرمىستىڭ تاپشىلىعى قازاقتىڭ قاي بالاسىن ەتەكتەن تارتپاعان، قولدىڭ قىسقالىعى وقىسام دەپ ورشەلەنىپ جۇرگەن پاريدانى دا جاناي ءوتىپ، ونى جوقشىلىقتىڭ  تاباسىنا  قارىپتى. «قايتەر ەدىك ومىرگە كەلمەگەندە، كونەمىز عوي، قايتەمىز كونبەگەندە» دەپ اقيىق  اقىن  مۇقاعالي  ايتقانداي،  ءومىردىڭ اشتى سىناعىنا قازاقتىڭ قارشاداي قىزى مويىن ۇسىنعان جوق، سىناعان سايىن ساڭلاقتانىپ، قىسقان سايىن قايراتتانا ءتۇستى. اۋىل قىزى تۇرمىستىڭ شاش اعارتارداي اۋىرتپالىعىن ارقالاپ ءجۇرىپ، ونەر يگەردى، ءوزى كىشكەنە كەزىندە شەشەسىنەن كامزولدىڭ وڭىرىنە مارجان قاداۋدى ۇيرەنگەنى بار بولاتىن، كوڭىل اۋانى سوعان قۇلاي بەردى.

  «شاعانتوعاي اۋدانىندا مارجاننان ءساندى ىدىس-اياق، اشەكەي بۇيىمدار توقيتىن شەبەرحانا بار ەكەن» دەگەندى ۇزىن قۇلاقتان ەستىدى دە، كوپ ويلانباي جولعا شىقتى. ۋاقىتتى ۇتتىرماي سول جەردەن جارىم جىلعا تاياۋ ۋاقىتپەن مارجان  توقۋ،  مارجانمەن  اشەكەي  بۇيىمداردى بەدەرلەۋدى بەس قولىنداي  ءبىلىپ شىقتى.

  سودان بەرى سەگىز جىلداي ۋاقىت ءوتىپتى، پاريدا ءالى دە سول مارجاننىڭ كوزىنە قاراپ، ونەردىڭ تورىنە ۇمتىلىپ كەلەدى. مارجانمەن جاساعان بۇيىمدارى بۇل كۇندەرى  ەلدىڭ  كوڭىلىنەن شىعىپ، ەمىل بويىنداعى جۇرت پاريدانى «مارجان قىز» اتاپ كەتتى. كەشە ءوڭى ءبۇتىن كيىم كيە الماي، نامىس بۋعان اۋىل قىزىنىڭ  بۇگىن وڭىندە نۇر وينايدى، تالاپتى قىز تابىس تاۋىپ، اينالاسىنداعىلارعا ۇلگى شاشتى، ايىنا 4 مىڭ يۋاننان ارتىق كىرىس كىرگىزىپ، اتا-اناسى مەن اۋىلداستارىنىڭ اق  باتاسىن الدى. بۇرىن وتباسىندا بوس جۇرگەندە بۇنداي ءناپاقانىڭ اۋىلى الىس بولاتىن. ونەر دەگەندى ايتساڭشى، قولى باس بىلگى مارجانشىنىڭ ماڭدايىن جارقىراتتى.

  « ‹ءومىر ءوزى ۇيرەتەدى› دەگەن  ءسوزدىڭ جانى بار ەكەن، بويىڭدا نامىستىڭ وتى بولسا، ونەردى يگەرۋىڭ قيىن ەمەس ەكەن،-دەپ ءسوز باستاعان پاريدا الىكەن قىزى بىلاي دەپ اعىنان اقتارىلدى،-ءار ادامنىڭ بويىندا ءبىر ارتىقشىلىق بولادى، سول ارتىقشىلىقتى ساۋلەلەندىرگەن جاننىڭ باعى جانادى. مەن اۋىلدىڭ قاراپايىم ءبىر قىزى ەدىم، ءوزىم كىشكەنە كەزىمنەن باستاپ وسى مارجان ءتىزىپ، مارجانمەن ورنەك قيۋلاستىرعاندى ۇناتاتىنمىن، بۇگىن  سول ۇشقىن ونەرگە اينالىپ، تىرلىگىمنىڭ تىرەگى بولدى. مارجانمەن كوبىنەسە تۇرمىستىق بۇيىمدار مەن ساندىك بۇيىمدار جاسايمىن. مىنا ءبىر قۋىرشاقتى مارجانمەن بەدەرلەپ  شىعۋ ءۇشىن، جارىم كۇن ۋاقىت جۇمسايمىن، باعاسى 200 يۋان، انەۋ تۇرعان مارجان پاراحوتتى 2 كۇندە جاساپ بولدىم،   بۇلاردى جاساۋ ءۇشىن دە مۇقياتتىلىق كەرەك، ءبىر مارجان بوس توقىلىپ، ءبىر ءجىپ قاتە كۇرمەلسە، وندا جاساعان ەڭبەگىڭ زايا كەتەدى. ءارقانداي ونەردىڭ دە وزىندىك قيىندىعى بار، ءبىراق سول ونەردى ءوزىڭ ۇناتىپ، سونىمەن ۇيىقتاپ، سونىمەن ويانساڭ، وندا ول دا ساعان ومىرلىك سەرىك بولادى. مەنىڭ ‹مارجان قىز› اتالۋىم مارجانعا دەگەن ماحابباتىمنىڭ تەرەڭدىگىنەن دەپ  بىلەمىن».

  سۋرەتتە: پاريدا الىكەن قىزى الارماندارعا مارجاننان توقىلعان ساندىك بۇيىمىن تانىستىرۋدا.




رەداكتورى: الماگۇل اقاتبەك قىزى
 
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.