ونەرلى ورگە جۇزەدى

گۇلزات قىزىرموللا قىزى
 

  « تالاپتىعا نۇر جاۋار » دەپ دانا حالقىمىز بەكەر ايتپاعان-اۋ، بۇگىندە تارلان تاريحتىڭ ءتىلسىم سىرلارى دا سول تالانت يەلەرىمەن تاسىپ كەلەدى. جاس بولسا دا عىلىمعا ەرتە   ۇڭىلگەن،ءبىلىمنىڭ بيىگىنە قانات قاققان، «بىلسەم، ۇيرەنسەم» دەپ بار نارسەگە قىزىعا قارايتىن، ۋاقىتتى التىنداي سانايتىن، تاپقىرلىق   جاراتىپ، تالانتىن تاقىمداپ، باسقالاردى تاڭداي قاقتىرىپ جۇرگەن جاس جەتكىنشەكتەرىمىزدىڭ قاتارى كۇننەن-كۇنگە مولايۋدا. بۇل، ارينە قۋانارلىق ءجايت.

  كىشكەنتاي كەزىنەن باستاپ قولونەر، عىلىم-تەحنيكاعا اۋەس ءدىلدا مۇرات قىزى 1999-جىلى تولى اۋدانى وشەتى اۋىلىنداعى  قاراپايىم  ەگىنشى وتباسىندا دۇنيەگە كەلگەن. بالا كەزىنەن باستاپ ۇيرەنۋگە قۇشتار ول ءارقانداي جاسامپازدىققا تالپىنعىش ەدى. بالاسىنىڭ وسى تالانتتىلىعى مەن زەرەكتىگىن بايقاعان اتا-اناسى وعان قولداۋشىلىق ەتە وتىرىپ، 2012-جىلى تولى اۋدانى 1-ورتا مەكتەپكە وقۋعا تۇسىرەدى. سول جىلدان باستاپ 1-ورتا مەكتەپتىڭ 3D تاپقىرلىق كلاسىنا سىرتتاي ساباققا قاتىناسىپ، ەرلان مۇعالىمنىڭ جەتەكشىلىگىندە بويىنداعى تالانتىن ءتىپتى دە ۇشتاي تۇسەدى. ءسويتىپ، ءتۇرلى جاڭالىق جاراتۋ بىلىمدەرىن ۇيرەنىپ، تىنباي قۇلشىنۋ ارقىلى سۋ ۇنەمدەۋ كنوپكاسىن تاپقىرلاپ شىعىپ، 2014-جىلى مەملەكەتتىك ءبىلىم مەنشىگى ۇقىعى مەكەمەسىنىڭ ساراپتاۋىنا جولداپ،  سول جىلى پاتەنت كۋالىگىن الادى جانە 2014-جىلى ايماقتىق جاس وسپىرىمدەر جارىسىنا قاتىناسىپ، 1-دارەجەلى سيلىق يەگەرى بولىپ ماراپاتتالىپ، مەملەكەتتىك جارىسقا جولداما الادى. بۇل تاپقىرلىقتىڭ رولى مىناداي: ادەتتەگى سۋ ترۋبالارى قولمەن مەڭگەرىلەتىندىكتەن، قول جۋعان كەزدە جابىلماي، سۋ زايا بولادى. ال بۇل تاپقىرلىقتىڭ سۋ ۇنەمدەۋ كنوپكاسى اياقپەن مەڭگەرىلەتىندىكتەن، قولعا سابىن جاققاندا ونى اياقپەن باسىپ تۇرسا، سۋ توقتاپ، ادەتتەگى كنوپكالاردان جارىم كيلوگرام اينالاسىندا  سۋ ۇنەمدەي الادى، مۇنىڭ تاعى ءبىر  ەرەكشەلىگى باكتەريانىڭ قول ارقىلى تارالۋىنىڭ الدىن  الادى. ادەتتە  قول  جۋاردا  كنوپكانى قولمەن اشامىزدا  جۋىپ بولعاننان كەيىن تاعى قولمەن جابامىز، وسى بارىستا كنوپكاداعى باكتەريالار قايتادان قولعا جۇعادى. ال بۇل تاپقىرلىق اياقپەن مەڭگەرىلەتىندىكتەن، ميكروپتىڭ قايتا قولعا جۇعۋىنىڭ الدىن الادى.

  ءدىلدا بۇل تاپقىرلىعىن 2015 -جىلى ءساۋىردىڭ سوڭىندا باسەكەگە قاتىناستىرىپ، پاتەنت ۇقىعىنا ءوتىنىش ەتپەك. ءدىلدا وزىنە قاتاڭ تالاپ قويۋىنىڭ ارقاسىندا سان مارتە سيلىق تورىنەن كورىنىپ، ەڭبەگىنىڭ ەش كەتپەگەنىنە ءدان ريزا بولسا؛ اتا-اناسى مەن مەكتەبى دە ونىڭ  تابىستى ەڭبەگىنە ريزاشىلدىعىن ءبىلدىرىپ وتىر.

  «اقىل شىراق قارا ءتۇندى اشاتىن، ءبىلىم جارىق نۇرىن ساعان شاشاتىن» دەمەكشى، الداعى جەردە ەلىنىڭ ءۇمىتى مەن تىلەگىن ارقالاعان قارا كوزىمىزدىڭ تىنباي قۇلشىنىپ، تالعار بيىكتەردەن كورىنە بەرۋىنە تىلەكتەسپىز.

  سۋرەتتە: ءدىلدا مۇرات قىزى

رەداكتورى: الماگۇل اقاتبەك قىزى
 
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.