دۋو لاي
ۋنيۆەرسيتەتتى بىتىرگەننەن كەيىن، ول ءبىر ورگانعا قىزمەتكە شىقتى. العاشقى اشىلعان جيىندا-اق، الدىڭعى قاتاردا وتىرىپ باسشىنىڭ ءسوزىن تىڭدادى. باسەكەڭنىڭ ءسوزى اقىرلاسىمەن ول شاپالاق سوقتى.
الدىڭعى قاتاردا وتىرماي ما، قالاي ۇرعانى بەسەنەدەن بەلگىلى بولىپ-اق تۇر، تىم شىركىن-اي ەمەس. جيىننان كەيىن باسەكەڭ وعان ارناۋلى ادام جىبەرىپ، شاپالاقتى قالاي سوعۋدى ۇيرەتتى.
كەلەسى جيىندا ول باسشىنىڭ ءسوزىن جانە دە الدىڭعى قاتاردا وتىرىپ تىڭدادى. باسشىنىڭ ءسوزى اقىرلاسا بەرە جانە دە شاپالاق سوقتى، بۇل جولى الدىڭعىعا قاراعاندا جاقسى بولىپ قالعان ەدى. جيىننان كەيىن باسەكەڭ تاعى دا ارناۋلى ادام جىبەرىپ، شاپالاقتى قالاي سوعۋدى جالعاستى ۇيرەتكىزدى. نەشە رەت وسىلاي قايتالانعاننان كەيىن، ول شاپالاقتى قالاي سوعۋعا ابدەن جاتىلىپ الدى.
تاعى ءبىر جيىندا جانە دە الدىڭعى قاتاردا وتىرىپ باسشىنىڭ ءسوزىن تىڭدادى. باسشى ءسوزىن اقىرلاستىردى، ول شاپالاق سوعىپ وتىر. شاپالاقتى ەكپىندەتە سوققانى سونشالىق، ءتىپتى، قارا تەرگە مالشىنىپ كەتتى. ول باسەكەڭنىڭ رازى بولعانىن دا بايقادى. جيىننان كەيىن باسەكەڭ ءوزى ارناۋلى كەلىپ، «شاپالاقتى جاقسى سوقتىڭ» دەپ كەتتى.
وسىدان كەيىن باسەكەڭ سوزگە شىقسا بولدى، ول ىلعي الدىڭعى قاتارعا ورنالاستىرىلادى، جۇرتتى ىلەستىرە باسەكەڭ ءۇشىن دۇرىلدەتە شاپالاق سوعادى. ءدال وسىلاي تالاي جىل ءوتتى. الىمدى جاس ورتا جاستاعى اعاعا اينالدى.
ەندى، مىنە ءوزى مىنبەدە وتىر، باسشى بولعان. تالاي جىلدىڭ الدىنداعى الگى باسشى سياقتى اسا ءبىر ىجداعاتپەن ءسوز سويلەدى. ءسوزى دە اقىرلاستى. تارس-تارس ەتكەن شاپالىق ءۇنى از عانا ۇرىلىپ بارىپ ۇزدىكتى، ءبىر ادامنىڭ عانا سوققان شاپالاعى. عاجاپ، تومەندە وتىرعان وزگەلەر ىلەسە سوقپاعان، ءبارى اڭتارىلا اڭقيىپ وزىنە قاراپ وتىر.
قىپ-قىزىل بولىپ كەتكەن الاقانىنا قاراعان ول بىردەمەنى بىلگەندەي بولدى. ول جاڭا وزىنە-ءوزى شاپالاق سوعىپ وتىرىپتى.
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.