«ۇل بالانى تاربيەلەۋ وڭاي ەمەس» دەيدى بىلگەندەر. بۇدان قىز بالانى تاربيەلەۋ وڭاي ەكەن دەپ ويلاماڭىز. سەبەبى ۇل بالانىڭ وزىنە ءتان قاسيەتتەرى بار. دەمەك،ۇل ءوسىرىپ وتىرعان انالارعا اسا ىجداعاتتىلىق كەرەك.
ادامدارعا دەگەن دۇرىس كوزقاراس قالىپتاستىرىڭىز. سىرىن بارىنە ەمەس،تەك ءبىر ادامعا ايتسىن. سول ادام ءسىز بولىڭىز. سوندا ۇلىڭىزدا ادامدارعا دەگەن سەنىم قالىپتاسادى، ءوز ويىنا تەرەڭ بويلايدى.
قانداي دا ءبىر ءىس بولماسىن قولداڭىز. ۇل بالاعا ەڭ قاجەتتى بايلىق وزىنە دەگەن سەنىمدىلىك. ازىرشە بۇل سەنىمدىلىكتى ءسىز ارقىلى الادى،ءسىزدىڭ نازارىڭىز ۇلىڭىز ءۇشىن ماڭىزدى.
بىرگە كىتاپ وقىڭىز. ءوزىڭىز وقىعان كىتاپتى ۇلىڭىز دا وقىعانىن قالاساڭىز،قىزىعۋشىلىعىن ارتتىرۋعا تىرىسىڭىز.
ايەل زاتىن قۇرمەتتەۋگە ۇيرەتىڭىز. قارىنداسىن ءتۇرتۋ،باقشاسىنداعى قىزداردىڭ شاشىن تارتۋ بۇلار ءتۇسىندىرۋدى قاجەت ەتپەيدى دەپ ويلايتىن شىعارسىز،ءبىراق بۇل جازالاۋعا تۇراتىن ىسكە اكەلۋى مۇمكىن.
ادەپ قاعيدالارىن ۇيرەتىڭىز. داستارقانعا ۇلكەننەن بۇرىن قول سوزباۋ،وزىنەن كىشىلەرگە جول بەرۋ،دۇرىس قارىم -قاتىناس جاساۋ،بۇل مايدا-شۇيدە دەپ ويلاماڭىز. مۇقيات بولساڭىز،كەلەشەكتە وزگەلەر ۇلگى ەتەتىن ۇلدىڭ اناسىنا اينالاسىز.
ءبىر نارسەگە سەنسە،ونىڭ بەتىن قايتارۋعا تىرىسپاڭىز. مىسالى،اياز اتا،سيقىرلى تاياقشاعا،التىن بالىققا... بۇلاردىڭ ءبارى ىزگىلىككە قىزمەت ەتەتىن وبرازدار.
سىپايىلىققا تاربيەلەڭىز. ۇل بالا جۇمساق سىپىرتقى ەمەس،ءبىراق رەتى كەلگەندە سىپايىلىق،ياعني ديپلوماتيالىق ىسكە بەيىمدىلىك قاجەت.
بىرگە ساياحاتقا شىعىپ تۇرىڭىز. بۇل ارقىلى ءسىز ۇلىڭىزدىڭ ۇيدەگى مەن تۇزدەگى ءوزىن-ءوزى ۇستاۋ قابىلەتىن بايقاي الاسىز.
باسقالارعا جاقسىلىق جاساۋعا ۇيرەتىڭىز. «جاقسىلىققا جاقسىلىق ءار ادامنىڭ ءىسى،جاماندىققا جاقسىلىق ەر ادامنىڭ ءىسى» ەكەندىگىن ۇقتىرىڭىز.
تاجىريبە ۋاقىتىمەن. ەگەر ۇلىڭىز ءبىر نارسەنى ويداعىداي ىستەي الماسا،ونى جازعىرماڭىز. بۇل بىلمەگەندىكتەن نە تاجىريبەسىزدىكتەن ەمەس. ۋاقىتىمەن تاجىريبە جيناپ بەيىمدەلىپ كەتەتىنىنە سەندىرىڭىز.
نەگە دەگەن سۇراقتارىن جاۋاپسىز قالدىرماڭىز. ۇلىڭىز كوپ سۇراق قويسا قۋانىڭىز. بۇل ونىڭ اقىل-ويىنىڭ دامۋىنا،جەتىلۋىنە ىقپال ەتەدى. نەگە دەگەن سۇراق قويماۋىنان قۇداي ساقتاسىن.
اكەسىمەن تىعىز قارىم-قاتىناس ورناتىڭىز. ۇل بالا ەموتسيونال جاعىنان كوبىنە اناعا جاقىن بولعانىمەن،رۋحاني تۇرعىدا اكەگە جاقىن. اكەسىمەن قارىم-قاتىناس ۇل بالانىڭ بويىنا ەرلىك قاسيەتتەردى دارىتادى.
بىرگە ارمانداپ ءۇي قۇرىڭىز. مەيلى توپىراقتان،مەيلى ويمەن. ۇل بالانىڭ جۇمىسقا قابىلەتى كىشكەنە قۇرىلىسشىلىقتان باستالادى.
ۇلىڭىزدى ۋاقىتىمەن ەركەلەتىپ،جىلۋلىق سەزدىرىڭىز. ماحابباتپەن تاربيەلەگەن بالانى بۇزۋ وڭاي ەمەس. بالاڭىزدىڭ جۇرەگىندەگى ماحاببات ونى كوپ جاماندىقتان قورعايدى.
ءارقاشان ۇيدەن ماقتاۋ ەستىپ تۇرسىن. سوندا كوشەگە ءۇيىر،ءۇيدى زىندان كورەتىن بالاعا اينالمايدى.
«ماتەريالدان»
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.