8
سەن - اۋەنسىڭ، سويتە تۇرا اۋەندى،
تۇيىق كۇيدە تىم جابىرقاۋ تىڭدايسىڭ.
نەگە سونشا جانىڭ دەرتكە تاۋەلدى،
نەگە ازاپتان راقات ىزدەپ تىنبايسىڭ.
نەگە بۇنى جۇمباقتايدى جۇمىر باس؟
ءبىر-بىرىمەن جاراسىمدى جارالعان.
كوپ دىبىستىڭ جالعىزدىققا جانى قاس،
الدە سول ما دەرتىڭ بويعا تارالعان؟
تاڭداپ كورشى، قىل ىشەكتەر تاماشا
تاتۋ-ءتاتتى ۇيلەسىمدى ءۇن قوسقان -
اكە، شەشە، جاس بالاسى وڭاشا
اسەم ءبىر ءان شىرقاعانداي تىنباستان.
كونسەرتتەگى كوپ-كوپ ۇندەس ىشەك مىناۋ،
جالعىزىلىك وزىممەن تەڭ دەپ تۇر-اۋ.
56
ەي، ماحاببات، اش ۇيقىڭدى! ناشار ما
وتكىر ءجۇزىڭ ءشول مەن اشتىق رۋىنان؟
مولشىلىقتا توقمەيىلسىپ،قاشار ما
ادام دەگەن ازىعى مەن سۋىنان؟..
ماحاببات تا سولاي. ونىڭ اش كوزىن
بۇگىن ۇقساڭ تويعانى ءۇشىن تۋعان دەپ.
ەرتەڭ تاعى قۇشاقتايسىڭ وتتى ءوزىڭ،
ءشىرۋ ەمەس، جانۋ ءۇشىن تۋعان دەپ.
ارتسىن دەسەڭ ماحابباتتىڭ باعاسى،
مۇحيت بولسىن مۇڭلى عاشىق ساعاتى.
قوس عاشىقتى سول مۇحيتتىڭ جاعاسى
قوشتاستىرسىن تاۋسىلعاندا تاعاتى.
سول ساعاتىڭ اياز بولسا ىزعىرىق،
كوكتەمىڭ تەز جەتۋى ءۇشىن قىزدىرىپ.
68
ونىڭ ءجۇزى - سۇلۋلىقتىڭ بۇرىنعى
ەركىن وسكەن كۇندەرىنەن قالعان نۇر.
ول سۇلۋلىق - گۇل كوكتەمدەي ءبىر ۇلگى،
جاپسىرماسى جوق ەدى عوي جالعان قۇر.
جۇرت ول كەزدە قورعان بۇزىپ،زيراتقا
مارقۇمداردى مازالاۋعا كىرمەيتىن.
ۇمىتىلىپ التىن بۇرىم-شيراتپا،
كوردەن شىعىپ،بوتەن باستا جۇرمەيتىن.
ونىڭ ءجۇزى قاراپايىم، سۇيكىمدى،
اۋزىن قولدان بوياماۋ دا ءتان وعان.
كوكتەمىندە كوك قىنا جوق سۇيكەندى،
جاڭا دا جوق كونەلەردى توناعان.
اجىراتپاق ءۇشىن كەرەك بۇل دەگەن،
اقيقاتتى جالعان ۇلدە-بۇلدەدەن.
100
قايدا مۋزا؟ ءوزىن بيىك سامعاتقان
اسىل جاندى جىرعا قوسپاي قايدا ءجۇر.
الدە ارزان سازسىماقتى سالماقتاپ،
جازىپ ءجۇر مە ءنارسىز-قۇنسىز مايدا جىر؟
سايرا، مۋزا، ونەرىڭدى ويناقى
باعالاعىش ابزال سۇلۋ جان ءۇشىن.
سول بارىدە سوزگە قۋات، ويعا اقىل،
قالامىڭا قايرات - سونىڭ جانى شىن.
كوركەم ءجۇزىن كوز سۇعىنتا كورە ءبىل،
اجىم تاپساڭ،وتىن جۇمساپ بار كۇشتىڭ.
سۇلۋلىقتى توناعاننىڭ بەتىن ءتىل،
جىرمەن سوعان تاڭباسىن باس قارعىستىڭ.
مەزگىلدەن دە جىلدامىراق شارىقتاپ،
سولماس ءجۇزىن سۋرەتتەيتىن شابىت تاپ!
اۋدارعان - حاميت ەرعاليەۆ
شىعارمالاردى دايىنداعان –
قاجىبەك ايدارحان
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.