بالا كۇنىمىزدەن ۇيىقتار الدىندا بىرنەشە بەت كىتاپ وقۋ ادەتىن قالىپتاستىرماساق، جاعدايىمىز قيىندايدى. زامان اعىمىنا ساي كوپ وقۋشى «اباي جولى» سىندى ۇزاق رومانداردى وقۋعا ۋاقىت تاپپايدى. ال بۇل قيىندىقتى قالاي جەڭۋگە بولادى؟ مەكتەپتەگى ادەبيەت ءپانىن قالاي جاقسى وقيمىز؟
كىتاپتار ءتىزىمى. ەڭ الدىمەن، وقىلۋى ءتيىس كىتاپتاردىڭ ءتىزىمىن جاساعانىڭىز ءجون. جاقىندا وقىلۋى كەرەك دەگەن كىتاپتاردى تاڭداڭىز. ادەتتە ادەبيەت ءپانىنىڭ حرەستوماتسياسىندا رومانداردىڭ تەك ءۇزىندىسى بەرىلەدى. سول رومانداردىڭ تولىق نۇسقاسىنان باستاۋىڭىزعا بولادى. مۇنىمەن قاتار،تاڭداعان ادەبيەتىڭىزگە سايكەس، ولاردى بىرنەشە بولىككە ءبولىڭىز. مىسالى،ءوزىڭىزدىڭ دامىتۋعا ارنالعان كىتاپتاردى ءبىر باعانعا،سۇيىكتى باسپاڭىزدىڭ كىتاپتارىن ەكىنشى باعانعا،پسيحولوگيالىق رومانداردى ءۇشىنشى باعانعا جازۋىڭىزعا بولادى. ارينە، كىتاپ وقۋ ادەتىن بۇرىن-سوڭدى قالىپتاستىرماعاندىقتان، مۇنى جۇزەگە اسىرۋ قيىنعا سوعادى. الايدا تىرىسىپ كورىڭىز.
ءوزىڭىزدى ۇنەمى كىتاپ وقۋعا داعدىلاندىرىڭىز. ءبىر كىتاپتى وقىعان سوڭ اراعا ءۇش اي ۋاقىت ءۇزىلىس سالساڭىز، اتالعان ىسكە قايتا كىرىسۋ قيىنعا سوعادى. سول سەبەپتى از-ازدان بولسا دا كىتاپتى كۇندە وقۋعا تىرىسىڭىز.
بولاشاعىڭىز تۋرالى ويلاڭىز. الەۋمەتتىك جەلىدەگى قارىم-قاتىناس،تەلەديدارداعى شۋ، عالامتور جەلىسىندەگى قىزىقتى ۆيدەولار ءبىزدىڭ ميىمىزدى دامىتۋعا مۇمكىندىك بەرمەيدى. ءوزىمىزدى دامىتۋعا كۇنىنە ءبىر ساعات ۋاقىت ارناۋ ارقىلى ۇلكەن مۇمكىندىكتەردىڭ ەسىگىن اشامىز. مۇنىمەن قاتار،كىتاپ وقۋدىڭ جۇيكە- جۇيەنى تىنىشتاندىرىپ، كۇيزەلىستى وڭاي وتكەرۋگە كومەكتەسەتىنى انىقتالعان. ولاي بولسا،نەگە ۇيىقتار الدىندا كىتاپ وقىماسقا؟
ۇنەمى وزىمىزبەن بىرگە كىتاپ الىپ ءجۇرۋدىڭ پايداسى بار. ونى كەپتەلىستە، دۇكەندە، كەزەكتە تۇرعان كەزدە،ساباق اراسىنداعى ۇزىلىستە الىپ وقۋىمىزعا بولادى. ەڭ باستىسى،ۋاقىتىمىزدى بوسقا شىعىندامايمىز.
ءوزىڭىزدى قيناماڭىز. ەگەر رومان جەلىسى قىزىقتىرماي،ارتىنشا جالىقتىرىپ جىبەرسە بۇل كىتاپتى ارى قاراي وقىماعانىڭىز ءجون. الايدا،بىرنەشە كىتاپتى قاتار وقۋعا اسىقپاڭىز. وقىعان سوڭ وزىڭىزگە ويلانۋعا ۋاقىت بەرىڭىز. ەڭ باستىسى، وزىڭىزگە پايدالى دەگەن كىتاپتى تاڭداۋعا تىرىسىڭىز.
«جۇمىلا كوتەرگەن جۇك جەڭىل». كىتاپ وقۋ ادەتىن ۇيدەگى اپەكە،باۋىرلارىڭىزبەن نەمەسە دوستارىڭىزبەن بىرگە قالىپتاستىرىپ كورىڭىز. وقىعان كىتاپتارىڭىز تۋرالى پىكىر الماسىڭىزدار. الايدا،كىتاپ وقۋدى جارىسقا اينالدىرۋدىڭ قاجەتى جوق. ەسىڭىزدە بولسىن،ءسىزدىڭ اقىل-پاراسات دەڭگەيىڭىز وقىعان كىتاپتارىڭىزدىڭ سانىنا ەمەس،قانشاسىن تۇسىنە العانىڭىزعا بايلانىستى.
ال، ءسىز ادەبي كىتاپتار وقۋ ادەتىن قالىپتاستىرعانسىز با؟
(ماتەريالدان)
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.