ەركىنبەك وكەن ۇلى
سوناۋ بال بالالىق شاعىمنان قازىرگە دەيىن ءار كۇنگى ارايلاپ اتقان اق تاڭمەن بىرگە جانعا شۋاق، كوڭىلگە رۋحاني ازىق سيلايتىن مەنىڭ اياۋلى ۇستازىم، ابزال دوسىم راديو بەرىلىمدەرىنەن ەشقاشان الىستاپ كورمەدىم.
ءالى ەسىمدە، بالا كەزىمدە ۇيىمىزدەگى راديو قابىلداعىش ەڭ حاۋىپسىز، ورنىقتى، ەشكىمنىڭ قولى جەتپەيتىن، بيىك جەردەن ورىن الاتىن دا مايى تاۋسىلىپ قالماۋ، بىرەۋىمىزدىڭ وقىس جاعدايدا سوقتىعىپ بۇزىلۋىنا، تولقىنىن الباتى جوتكەۋگە سەبەپكەر بولماۋ دەگەن وتباسىمىزداعىلاردىڭ بۇلجىتپاي ورىندايتىن ەرەجەسى بولاتىن. ويتكەنى دۇنيەنىڭ تۇكپىر-تۇكپىرىندەگى جاڭالىقتارمەن، الۋان ءتۇرلى باي مازمۇندارمەن قاۋىشتىراتىن، ءبىز ءۇشىن، ەڭ قاسيەتتى دە قاستەرلى قازىنامىز سول راديو قابىلداعىش ەدى. ءار كۇنگى راديونىڭ بەرىلىمدەرىن تىڭداۋ وتباسى مۇشەلەرىمىزدىڭ داعدىلى ادەتىنە اينالعان. زارۋلىگىمىز سول، راديو قابىلداعىشتى كەز كەلگەن دۇكەندەردەن ساتىپ الۋعا مۇمكىندىك بولماعاندىقتان، بۇزىلىپ قالىپ راديو بەرىلىمدەرىن تىڭداي الماي قالۋدان الاڭداپ، تەك وتباسىمىزداعى جاۋاپتى ادامنان باسقا ەشقايسىمىزدىڭ ۇستاۋىمىزعا، سوقتىعۋىمىزعا، باسقا ورىنعا جوتكەپ قويۋىمىزعا مۇلدە رۇقسات ەتىلمەيتىن. ونى باسقا ورىنعا جوتكەپ نەمەسە تولقىنىن وزگەرتىپ، وقىس جاعدايدا بۇزىلۋىنا سەبەپكەر بولساق، بىتكەنىمىز سول. ونسىزدا سول جىلدارى راديونىڭ تارالىم اۋماعىنىڭ اسەرى مە، ايتەۋ راديو قابىلداعىشقا انتەننا جالعاپ، تولقىن تەتىگىن بۇراپ ءجۇرىپ راديو بەرىلىمدەرىن ارەڭ دەگەندە تاباتىنبىز دا ونداعى حابار، اقىندار ايتىسى، ءان- كۇي، رومان، ت،ب بەرىلىمدەرىن ۇيىپ تىڭداپ، جىم- جىرت كۇيگە ەنەتىنبىز. كەشكە اينالعاندا راديو قابىلداعىشتىڭ سيگنالى جاقسى بولماي، ۇلتتىق راديو بەرىلىمدەرىمەن قوسا، باسقا راديو بەرىلىمدەرى قوسانجارلاپ شىعىپ الۋشى ەدى. ول كەزدە ءتىپتى دە اۋرە-سارساڭ بولىپ، راديو بەرىلىمدەرىندەگى روماننىڭ جالعاسى، اقىندار ايتىسى، اسەم ءان، ءتاتتى كۇيدى تىڭداي الماعانىمىزعا اتتەگەن-ايلاپ قاتتى وكىنەتىنبىز.
وسىنداي سان بۇرالاڭ جىلداردى باستان كەشىرىپ، بۇل كۇندەرى وزىق جابدىقتارمەن جابدىقتالىپ، تارالىم قۋاتى مەن تاراتۋ سيگنالى كۇشەيىپ، قامتىم اۋماعى كەڭەيىپ، تورتكىل دۇنيەنىڭ قايسى بۇرىشىندا جۇرسەك تە الۋان ءتۇرلى فورماداعى راديو قابىلداعىش نەمەسە توراپ لەنياسى ارقىلى تۇتاس كۇندىك بەرىلىمدەرىنەن حاباردار ەتەتىن، مەنى سونشالىق وزىنە ءتانتى ەتكەن مازمۇن جانە فورما جاعىنان ءار كۇن سايىن جاڭالانىپ تۇراتىن؛ مەنەن ەشقانداي اقى تىلەمەستەن، قايتا مول رۋحاني ازىق، كوپتەگەن ءبىلىم ءنارىن سىيلاعان، پارتيا مەن ۇكىمەتتىڭ ابزال ساياساتىن، جاھاندا بولىپ جاتقان جاڭالىقتاردان دەر كەزىندە حابار تاپتىرىپ وتىراتىن اياۋلى ۇستاز، ابزال دوسىم ۇلتتىق راديونىڭ بەرىلىمدەرىنە العىستان باسقا ايتارىم جوق.
تەك مەن عانا ەمەس، بارشا تىڭدارمانداردىڭ سىرلاس دوسى، اقىل- كەڭەسشىسى، زاڭ ءبىلىمى مەن عىلىم- تەحنيكالىق بىلىمدەردى ۇيرەتۋشى، جول باستاۋشى ۇستاز، سان عاسىردان شەجىرە شەرتەتىن، ۇلت مۇراسىن ۇلاعاتتاپ، تىڭدارماندارىنىڭ قۇلاق قۇرىشىن قاندىرىپ، رۋحاني ازىق سيلايتىن، باي قازىناعا تولى ۇلتتىق راديونىڭ بەرگەننەن بەرەرى مول بولسا ەكەن دەگەن تىلەكتەمىن.
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.