حوشي شينيتجي (جاپونيا)
ءومىرى ساياحاتقا شىعىپ كورمەگەن ءبىر اقساقال بولىپتى. ول تۋمىسىنان سودەگەي مىنەزدى، سالدىر- سالاق، اڭگۇدىكتەۋ ەدى. ونى ءوزى دە انىق بىلەتىن. سوندىقتان ساپارعا شىقپاعانى ەڭ حاۋىپسىز ەدى.
ءبىر كۇنى ول تۇتقيىل «دەنساۋلىعىم ساۋ كەزدە، قول-اياعىم يكەمدى كەزدە ساياحاتتاپ كەلمەيمىن بە؟» دەپ ويلايدى دا شەتەلگە ساپارعا اتتانادى. ول وتىرعان ۇشاق ءمالىم ەلدىڭ اۋەجايىنا جايىمەن كەلىپ قونادى.
بۇل ارادا وسى اۋەجايعا ءبىر ميلليونىنشى بولىپ كەلگەن ساياحاتشىنى قابىلداۋعا دايىندىق جاسالىپ جاتقان بولاتىن. سونىمەن ول تالەيى وڭىنان كەلىپ، ۇشاقتان تۇسە سالىسىمەن قىزعىن قارسى الىنادى. سۇلۋ ارۋلار تالاسا-تارماسا كەلىپ، وعان گۇل ۇسىنادى. بۇدان سىرت، ءار ءتۇرلى ادەمى ءارى باعالى سيلىقتارعا يە بولادى. ەڭ جوعارى دارەجەلى كۇتىمگە بولەنىپ، ەڭ ۇزدىك جول باستاۋشى بويجەتكەن ونى ەرتىپ ءجۇرىپ ساياحاتتاتادى ءارى مۇنىڭ بارلىعى دا تەگىن بولادى.
بالكىم، بۇل مول كۇتىمنەن ونىڭ ەس- اقىلى ءسال شىعىپ، قايتەرىن بىلمەي قالسا كەرەك. كەمەگە وتىرىپ ەندىگى ءبىر مەملەكەتكە بارىپ، كەمەجايدان جاعاعا شىققالى تۇرعاندا، الگى سالدىر-سالاقتىق ادەتىنە باسىپ، اڭعالدىقپەن وزگەلەردىڭ سومكەسىن الىپ كەتەدى. ول سومكەنى اشىپ قاراسا، ىشىنە اق ءتۇستى تالقان تولتىرعان سۋلياۋ قالتالارعا تولىپ تۇر ەكەن. وسىلاي بولسا دا قارت مۇنى ءوزىمنىڭ قاتەلىگىم دەپ ەسەپتەيدى.
- مەنىڭ سومكەمدى كىم اڭعارماي الىپ كەتتى ەكەن، نەندەيبىر تالقاندى ماعان قالدىرىپ، ەندى قايتتىم مۇنى؟
ول سومكەنى الىپ تاسىمال سەرىكتەستىگىنە كەلىپ، نارازىلىق بىلدىرەدى. بۇل ويلاماعان جەردەن بۇكىل ەلدى ءدۇر ەتكىزەدى. ءاسىلى حيميالىق تەكسەرۋ ارقىلى بۇل اق تالقاننىڭ تۇتاسىمەن ءمالىم تۇردەگى جانسىزداندىرۋ ءدارىسى ەكەنى بايقالادى. قاتىستى تارالاۋ قولما-قول قۋدالاۋ قيمىلىن ورىستەتىپ، اتكەزشىلىك توپتىڭ بىرنەشە باستى قىلمىستىلارىن تەز ارادا تۇتقىندايدى. زاۋدەعالام، بۇل جانسىزداندىرۋ ءدارىسى ساتىلىپ كەتسە، اناۋ قىلمىستى توپتىڭ قوماقتى زاڭسىز بايلىققا كەنەلەتىنى مۇندا تۇر ەدى.
قاريا اتكەزشىلىك توپتى انىقتاپ، تۇتقىنداۋعا ۇلەس قوسقاندىقتان، ماداقتاۋعا بولەنەدى ءارى نەداۋىر قوماقتى سيلىق اقشاعا دا يە بولادى. ءبىر مەزەت ول وسى ەلدەگى اتى شىققان شەتەلدىككە اينالادى. ەلدىڭ ءبارى وعان قۇرمەتپەن قارايدى. ونىمەن بىرنەشە اۋىز سويلەسىپ قالعانىنا بولا وزدەرىن باقىتتى سەزىنەدى. اۋەلى، كەيبىرەۋلەر ارناۋلى داستارقان جايىپ قوناق ەتەدى.
بۇل ارانى ساياحاتتاپ بولعان سوڭ، قاريا تاعى ءبىر مەملەكەتكە اتتانادى. بۇل ارادا ونىڭ اڭگۇدىكتىك ادەتى تاعى ۇستاپ قالادى. ول كوشەگە شىعىسىمەن ءبىر سۋ جاڭا اۆتوموبيل ونىڭ قاسىنان سۇيكەپ وتەدى. قاريا ەدەمدە جول شەتىنە جىعىلىپ تۇسەدى. دەسەدە، ەشقانداي جارالانباعان ەدى، بار بولعانى ازداپ تەرىسى سۇرىلەدى.
ءبىراق، بۇل اۆتوموبيلدىڭ يەسى وسى ەلدەگى ەڭ اۋقاتتى ادام ەدى. ول ءوز ابىرويىنىڭ وسى ىسكە بولا ىقپالعا ۇشىراماۋى ءۇشىن، قاريانى ەڭ جاقسى شيپاحاناعا جەتكىزىپ ەمدەتەدى. قاريا شيپاحانادان شىققان سوڭ، ونى ءوز ساياجايىنا قوندىرادى ءارى وعان ارناۋلى حاتشى مەن كۇتۋشى دايارلاپ، وعان ءوز قالاۋى بويىنشا تۇرمىس كەشىرۋىن ايتادى.
ساياحاتىن وسىلايشا اقىرلاستىرعان قاريا ءوز ەلىنە ورالادى. قاريانىڭ اۋزىنان ساياحاتتاۋ بارىسىنداعى كورگەن-بىلگەندەرىن ەستىگەندەردىڭ ءبارى بۇعان ىشتەي قاتتى قىزىعادى. ءبىراق، قاريانىڭ بۇدان العان اسەرى كوپشىلىكتىڭ كوزقاراسىنا تىم ۇقسامايتىن ەدى. سودان باستاپ ول ءار كۇنى «ساياحاتتاۋ دەگەننىڭ سونداي ءبىر قىزىقتى ءىس ەكەنىن كىم ويلاعان! ەگەر جاس كەزىمدە ساياحات قىزىعىنىڭ ءدامىن تاتقان بولسام، وندا قانداي جاقسى بولار ەدى. ءاي، مەن بۇكىل ءومىرىمدى وسىلايشا بەكەر وتكىزگەن ەكەم- اۋ !» دەپ كۇڭكىلدەي بەرەتىن بولىپتى.
اۋدارعان - قانات جۇماش ۇلى
رەداكتورى: پارزانا عادىلبەك قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.