«جەتى قىزىمنان جەتەلى كەلىنىم ارتىق»

باقىتبەك نۇراقىمەت ۇلى،باقىت بەرىكقان ۇلى
 

  قىز بالا جات جۇرتتىق بولعاندىقتان، ۇزاتىلىپ بارعان جەرىندە بالداي باتىپ، سۋداي سىڭسە نۇر ۇستىنە نۇر بولىپ، باعىپ-قاققان اتا-اناسىنىڭ ۇرپاق تاربيەلەۋدەگى ۇلاعاتتىلىعىن تاعى ءبىر قىرىنان ايگىلەپ،قادىر-قاسيەتىمەن جەتەلى كەلىن اتانىپ، ەل قۇرمەتىنە يە بولسا ودان وتكەن باقىت جوق شىعار.

  شاعانتوعاي اۋدانى التىن ەمىل اۋىلىنىڭ بايبىشە قىستاعىنداعى تۇرسىنگۇل ۋيشا قىزى انە سونداي جەتەلى كەلىندەرىمىزدىڭ ءبىرى، ءبىرى بولعاندا بىرەگەيى دەر ەدىك. ولاي دەيتىنىمىز 2004-جىلى جولداسى مۇراتقالي قاليباي ۇلىمەن باس قۇراپ، قارا شاڭىراققا كەلىن بولىپ    ءتۇسۋى تاتار ۇلتىنان شىققان بۇل قىز بالانىڭ جات ەل، جات جۇرتقا كەلىندىك پارىزىن وتەۋىنىڭ باستاپقى جولى وڭايشىلىققا تۇسپەدى. دەسەدە، كىشكەنتايىنان ۇلاعاتتى اتا-انا تاربيەسىن بويىنا توعىتا ءبىلىپ، ۇلكەندى قۇرمەتتەپ، كىشىنى ايالايتىن،مۇراتتى دا ءمورالدى بولىپ ەرجەتكەن وسى ءبىر يبالى كەلىن ۇزاق جىلدار بويى قىستاقتىڭ ايەلدەر قىزمەتىن ءبىر كىسىدەي ابىرويمەن ىستەگەن ىسكەر ەنە جاڭىلقان اۋەلقان قىزىنىڭ  ءوز بالاسىنداي كورىپ باۋلۋىندا توپشىسى قاتايىپ،ءتۇرلى جۇمىستىڭ سىرى مەن قىرىنا جاتىلىپ، تاڭ اتقاننان كەش باتقانشا   ءبىتىپ بەرمەيتىن كۇيبىڭى مول كۇندەلىكتى ءۇي شارۋاسىن دەڭگەلەك اينالدىرۋدىڭ سىرتىندا،جولداسى  مۇراتقاليدىڭ   ەگىستىك جۇمىسىنا دا ءوز الىنشە كومەكتەسىپ، ءال-اۋقاتتارىن كەمەلىنە كەلتىرە باستاعان شاعىندا وتباسىنداعى قوس بىردەي بايتەرەگى جوعارى قان  قىسىمى اۋرۋىنان جىعىلادى. بۇل تۋرالى جاڭىلقان شەشەي: «وتباسىمىزدىڭ باس قالقاسى قاليباي ەكەۋمىز بىردەي 2003-جىلى جوعارى قان قىسىمىنان جىعىلىپ، وتباسىنىڭ بار اۋىرتپاشىلىعى ۇلىم مۇراتقالي مەن كەلىنىم تۇرسىنگۇلدىڭ مويىنىنا جۇكتەلگەندىكتەن،  بالالىق پارىزدارىن وتەپ، الىس-جاقىنداعى ۇلكەندى - كىشىلى ەمدەۋ ورىندارىنا اپارىپ، ناۋقاسىمىزعا شيپالىق ەم ىزدەسە دە ولارعا ماسىل بولىپ جازىلمادىق. سودان بەرگى ون نەشە جىل توسەك تارتىپ جاتىپ  قالعان ءبىزدى ءتۇن ۇيقىسىن ءتورت   ءبولىپ، بالاشا باعىپ، كۇندىز-ءتۇنى قاراۋمەن بولىپ، بارلىق قيىنشىلىعىمىزعا شىداپ كەلەدى. 2013-جىلى وتاعاسى ەمدەۋ شيپا بولماي قايتىس بولدى. ەكى ۇل،جەتى قىزدىڭ اناسىمىن.  ۇلدى ۇياعا، قىزدى قياعا قوندىرىپ، ءبارىنىڭ دە قارايلاساتىن اتا-اناسى، بالا-شاعاسى بار.  ءار ۋاقىت قىزدارىم كەلىپ كوڭىلىمدى سۇراپ قارايلاسىپ جاتادى، سوندا ولارعا ‹سەندەردەي جەتى قىزىمنان    جەتەلى تۇرسىنگۇل كەلىنىم ارتىق› دەپ قويام. ولاي دەيتىنىم، ۇزاق جىلداردان بەرى كەلىنىم ءوز اكە-شەشەسىندەي  كۇتىمدەپ،سۋىعىمىزعا توڭىپ، ىستىعىمىزعا كۇيدى. ءتۇننىڭ سارى تاڭىندا  نەشە ۋاقىت ورنىنان تۇرىپ،ءبىزدى   ارلى-بەرلى جاتقىزىپ، ۇلكەندى -  كىشىلى دارەتىمىزدى الىپ، كيىمىمىزدى اۋىستىرىپ تۇرادى. وسى بارىستا قاباق شىتپاي،قايتا كوڭىلىمىزدى اۋلاپ، قان قىسىمىن ولشەپ،ءدارى- دارمەگىمىزدى ۋاعىندا بەرىپ وتىرادى. وسىنداي قايىرىمدى كەلىنىم بولعانىنا قۋانامىن. قازىر كوز جۇمسام دا كەلىنىمە العىسىمنان باسقا ايتارىم جوق» دەيدى انالىق ريزاشىلىعىن ءبىلدىرىپ.

  تۇرسىنگۇلدىڭ اتا-ەنەسىن باعىپ-قاققان ەرشىمدى ەڭبەگىن باعالاي بىلگەن كورشى-قولاڭ،اۋىلداستارى 2011-جىلى قىستاق جاعىنان «ۇلكەندەردى قۇرمەتتەپ، كىشىلەردى ايالاۋدىڭ ۇلگىسى» ەتىپ سايلادى.

  ءيا،« قايىرىمدى  جۇرەك  قارتايمايدى»،«ءوزى جاقسى كىسىگە مىڭ كىسىلىك ورىن بار» دەمەكشى، اكە كورىپ ەرجەتىپ، انا كورىپ اقىل تۇيگەن  جاستارىمىزدىڭ قاتارى مولايا بەرگەي.
سۋرەتتە: تۇرسىنگۇل ەنەسىنىڭ قان قىسىمىن ولشەۋدە.           


       
رەداكتورى: پارزانا عادىلبەك قىزى
 
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.