لي دان
ەرتەدە، ءبىر كىشكەنتاي ۇل بالا قاقپا الدىنان ءبىر بالپاناقتى (پينگۆين) بايقاپ قالادى. سودان باستاپ بالپاناق بالاقايدان قالماي ەرىپ جۇرەدى. وسى ءبىر بەيشارا، پاناسىز بالپاناقتى بالاقاي جولدان اداسىپ قالعان بولۋى مۇمكىن دەپ توپشىلايدى.
بالاقاي بالپاناققا كومەكتەسىپ ۇيىنە جەتكىزىپ قويۋ بەكىمىنە كەلەدى. بىرەۋلەر وعان بالپاناقتىڭ وڭتۇستىك ۇيەكتەن كەلگەنىن ايتادى، الايدا بالاقاي ول جەرگە قايتىپ بارۋى كەرەك؟
بالاقاي پورتقا بارىپ، پاراحوتقا وزدەرىن وڭتۇستىك ۇيەككە الىپ بارۋىن وتىنەدى. الايدا ونىڭ داۋىسى وتە ءالسىز ەدى، پاراحوتتىڭ گۇرىلدەگەن دىبىسىمەن قوسىلىپ جوق بولىپ كەتەدى دە تىڭداۋعا مۇمكىن بولمايدى. ءسويتىپ، بالاقاي بالپاناقپەن بىرگە قايىعىن ايداپ وڭتۇستىك ۇيەككە ءوزى بارۋ بەكىمىنە كەلەدى دە كىشكەنتاي قايىعىن الىپ شىعىپ، تەڭىزدى ەسىپ ءجۇرىپ كەتەدى.
ولار بىرنەشە كۇن تەڭىزدە جۇزەدى. ساپار بارىسىندا بالاقاي بالپاناققا كوپتەگەن اڭگىمە ايتىپ بەرەدى، بالپاناق تا بار زەيىنىمەن تىڭداپ وتىرادى. ءسويتىپ، ولار تالاي تاڭداردى اتىرىپ، كەشتەردى باتىرىپ، اقىرىندا وڭتۇستىك ۇيەككە دە جەتەدى. بالاقايدىڭ قۋانىشىندا شەك جوق، الايدا بالپاناق ءۇنسىز كۇيدە قالعان ەدى.
بالاقاي بالپاناققا كومەكتەسىپ قايىقتان تۇسىرگەن كەزدە كەنەت بالپاناق ءتىپتى دە كوڭىلسىزدەنە تۇسەدى. ودان سوڭ بالاقاي قوش ايتىپ تەڭىزدە قايىقپەن ءجۇزىپ كەتە بەرەدى. ول ارتىنا بۇرىلىپ قاراعاندا، بالپاناق بۇرىنعى ورنىنان قوزعالماي بۇرىنعىدان ارى كوڭىلسىز كۇي كەشكەندەي بولادى.
ءوزىنىڭ جالعىز قالعانىن ويلاپ، بالاقاي دا ءبىر ءتۇرلى كۇيدە قالعان ەدى، قازىر قانداي اڭگىمە ايتسا دا تىڭدار قۇلاق جوق ءمانسىز ەدى. سونىمەن بالاقاي ويلانا باستايدى، ويلاعان سايىن ءوزىنىڭ ۇلكەن قاتەلىك وتكىزگەنىن سەزىنەدى. بالكىم، الگى بالپاناق استە جولدان اداسقان ەمەس، ول تەك جالعىزسىراعان بولۋى مۇمكىن.
بالاقاي تەزدەتىپ قايىقتىڭ باسىن بۇرىپ، ەسكەگىن جەدەل ەسىپ ارتىنا قايتادى.
از ۋاقىتتان سوڭ، بالاقاي قايتادان وڭتۇستىك ۇيەك شەڭبەرىنە دە جەتەدى، الايدا، الگى بالپاناق قايدا كەتىپ قالعان؟ ول ارى-بەرى ىزدەپ ونىڭ قاراسىندا كورە المايدى.
بالاقاي كوڭىلسىزدەنە ارتىنا قايتادى، تەڭىزدە قانشا جۇرگەنى بەلگىسىز، كەنەتتەن الدىڭعى جاقتان بىردەڭەنىڭ قاراسىن بايقاعانداي بولادى... ونىڭ ارالىعى بارعان سايىن جاقىنداي تۇسەدى، قاسىنا كەلگەندە بارىپ الگى بالپاناق ەكەنىن بايقايدى!
سوڭىندا بالاقاي مەن بالپاناق بىرلىكتە ۇيلەرىنە قايتادى،جول بويى ولار تاعى دا كوپتەگەن اڭگىمەلەر ايتىسادى.
بۇل اڭگىمە بولسا اۋليفۋ جەپا جازعان مەيىرىمدىلىك اڭگىمەسى ەدى، جازۋشى وسى اڭگىمە ارقىلى بىزگە ءاربىر ادام بەينە ءبىر جالعىزدىق جۇلدىزى ىسپەتتى، سوندىقتان ساپار بارىسىندا كەزىككەن ءار رەتكى ساپارلاستى، ءاربىر اڭگىمە مەن سەنىڭ ايتقان اڭگىمەلەرىڭدى ۇناتىپ تىڭدايتىن بارلىق ادامدى ەرەكشە قاستەرلەۋ كەرەك ەكەنىن ۇعىندىردى.
اڭگىمە ءوزارا شەرتىسكەندە عانا ءتىپتى دە تاتىمدى بولادى، جالعىزدىقتان ءبىر-بىرىنە ءوزارا سەرىك بولعاندا عانا ارىلادى...
اۋدارعان - ەركىنبەك وكەن ۇلى
رەداكتورى: پارزانا عادىلبەك قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.