ءناسيقات

    ءبىز دوستار كوكتەمىنىڭ شۋاقتى كۇنىندە، جاستاردا بولاتىن جالىنداعان كوڭىل كۇيمەن ساحاراعا ساياحاتتاي شىقتىق. كوڭىلىمىز مارە- سارە، كەڭ  دالا، اسقار  تاۋ، اشىق اسپان، كۇلىمدەگەن كۇن، تابيعات سونداي جانعا جايلى، قۇددى ءبىر سىزعان سۋرەت رەۋىشتى. وسىنىڭ بارىنە جانىمىز ماستانىپ كەلەدى.

ءبىز كوك جاساڭعا داستارقاندى جازىپ جىبەردىك تە ءدامدى استان اشقاراقتانا اساي باستادىق. ءدال وسى كەزدە قىردىڭ ءبىر قارتى كەلە قالماسى بار ما. كوڭىلىمىزگە ءبىر قىزىق شىعارۋ ساپ ەتە ءتۇستى.
بىرەۋ تۇرىپ:

- شالەكە، تىلەۋىڭىز قابىل بولدى ما؟ ەستۋگە قاراعاندا وسى ايدا بۇرىن ورازا ۇستاپسىز عوي!- دەدى.

ەندى بىرەۋ: 

- ءسىز ورازا ۇستاماساڭىز دا بىزبەن بىرگە اس ىشە المايسىز. ايتپەگەندە سىمىڭىزدىڭ پىشاقتاي بولىپ تۇرعان قىرى سىنىپ قالار!- دەدى.

قام- قايعىسىز جاستار ءبىرىمىز  اتىپ، ءبىرىمىز قاعىپ، ونى ابدەن كەلەكە ەتتىك. ءبىزدىڭ قىلجاعىمىز ءبىر جەرگە باردى- اۋ دەگەندە، قاريا بولماشى جىميىپ قويدى دا:

- ەگەر وسى وتىرعان بارلىعىڭ ءبىزدىڭ قىستاعىمىزعا بارعان بولساڭدار، سەندەردى تورەدەي كۇتەر ەدىم،- دەدى.

- ءسىزدىڭ قىستاعىڭىز قايدا؟- دەپ سۇرادىق ءبىز.

ول: 

- مەن باردامدار قىستاعىنىڭ قوجاسىمىن. ول ارا پۇلىسپەن كومكەرىلگەن جەر ۇيىقتىڭ ءوزى عوي، شىركىن! وسى ارادان مولشەرى 30 كيلومەتر شاماسى شالعايدا. سەندەر  ول اراعا نەگە بارىپ كورمەيسىڭدەر؟ وندا مەنىڭ مىڭعىرىپ جاتقان مىڭداعان قوي، سيىرىم بار، ەلدىڭ بارىنەن مەنىڭ مالىم كوپ. بارىڭدار، مايعا پىسىرعان نان مەن جوعارى سورتتى قۇرت-ىرىمشىكتىڭ ءدامىن تاتىپ قايتىڭدار. بارساڭدار، مەن قوناق قىلامىن....- دەدى.

ونى كەلەكە ەتكەن جەبەدەي ءسوزىمىزدى «سىندىرىپ»، دەرەۋ جيىپ الدىق. وعان ەندىگىدە ايتقان ءسوزىمىز بەن مامىلەمىز دە بىردەمدە وزگەرىپ شىعا كەلدى. سالدەن سوڭ

-اقساقال! وتىرىڭىز، بىزبەن بىرگە داستارقانداس بولىڭىز!- دەستىك.

- مەن جاقسىلىقتى بىلمەيتىن ادام ەمەسپىن، «سيعا سي، سىراعا بال» دەگەندى دە ۇعامىن. وسى مول دامدەرىڭ ءۇشىن قارتتىق تۇرعىدان ءبىر ءناسيقات ۇسىنايىن: سەندەر بارلىق جاندى باردامدار قىستاعىنىڭ قوجاسىنداي كورىپ، مادەنيەتتى، ادەپتى، جىلى مامىلەدە بولىڭدار. ال مەن بولسام جاراتقانعا انت ەتەيىن، ۇستىمدەگى وسى توز- توزى شىققان كيىمنەن وزگە، مىنا دۇنيەدە ەشتەمەم دە جوق پەندەمىن،- دەدى قاريا.


اۋدارعان - قانات جۇماش ۇلى


        
رەداكتورى: پارزانا عادىلبەك قىزى
 
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.