شى تيەشىڭ
ادامدار ونى جىندى دەسەتىن. ول ۇنەمى وزەن ماڭىنداعى قاراۋىتقان قالىڭ ورمان ءىشىن ارالايتىن. ۇزىن، اپپاق كويلەك كيىپ، ءوز-وزىنە كۇبىرلەپ سويلەگەندە ارۋاق دەرسىڭ.
ورماندا بەزىلدەك، ينەلىك، ۇلۋ، شىرىلداۋىق شەگىرتكە، ورمەكشى سياقتى ناسەكومدار جاسايدى... ول وقيات قيىنشىلىققا نە ازاپقا تاپ بولعان ناسەكومداردى ىزدەپ جۇرەدى.
تاستىڭ ۇستىندە شالقالاعان ساۋىتتى قوڭىز جىڭىشكە سيراقتارىن تىنىمسىز ەسىپ جانتالاسادى. ول ساۋىتتى قوڭىزدى ەپپەن اۋناتتى. قوڭىز قاناتىن جايىپ ۇشا جونەلگەندە، ول:
-مىنا قوڭىز عاجاپتانىپ، تاڭىرگە العىس ايتقان شىعار،-دەيتىن.
ءبىرقانشا قۇمىرىسقا جابىلىپ ناننىڭ كەسەك قوقىمىن زورعا سۇيرەتىپ بارادى. ول قوقىمدى جاپىراقپەن ءىلىپ الىپ قۇمىرىسقا يلەۋىنە جەتكىزدى. ويىنا كوكتەن شەلپەك جاۋدى دەگەن تىركەس تۇسە قالىپ كۇلىپ جىبەردى.
ءبىر جىگىت مىلتىعىن كەزەپ اعاش باسىنداعى تورعايدى كوزدەپ تۇرعان. ول جەردەن جالما-جان ءبىر كەسەك تاس الىپ بار پارمەنىمەن اعاش باسىنا لاقتىردى. تورعاي پىر ەتىپ ۇشا جونەلدى...
ءبىرقانشا قارت وزەن جاعاسىندا قارماق سالىپ وتىردى. ول ءان ايتىپ ايعايلاپ وزەن ماڭىنان جۇگىرىپ ءوتتى. سەكەم العان بالىقتار وزەن تۇبىنە سۇڭگىدى. باسپالاي بۇعىنعان بالالار تور جايىپ، ينەلىك ۇستاۋعا دايىندالعان. ول اعاش بۇتاعىن سەلكىلدەتىپ ينەلىكتى ۇركىتتى... وسىلاي ىستەگەندە ونىڭ كوڭىلى مارقايىپ قالادى. ارينە، كوپشىلىك ونى «ەسۋاس! اڭگۇدىك!» دەپ تىلدەيدى. ول بۇعان اشۋلانبايدى. سەبەبى، ول باقىتقا ماستانىپ جۇرەدى.
-مەن ولاردىڭ پەرىشتەسىمىن. وسىلاردىڭ ومىرىنە شاپاعاتشى بولامىن،-دەپ كۇبىرلەيتىن.
الايدا، تاعى ءبىر جاعداي ونى ۇمىتسىزدەندىردى: ءبىر تاۋەت الا قوڭىزعا قاراي باسپالاپ جاقىنداپ كەلەدى ەكەن. تاۋەتتى تىرلىگىنە تالعاجاۋ بولارلىق ازىعىنان ايىرۋ كەرەك پە؟ الدە، الا قوڭىزدىڭ ءولىم قۇشۋىن قول قۋسىرىپ كۇتۋ كەرەك پە؟ ول كويلەگىن ەكى قولىمەن مىتي ۇستاپ ابىرجىعان الپەتپەن تاۋەت جانە الا قوڭىزعا قادالىپ قالىپتى. ءوڭى بوزارىپ كەتكەن. ول قايسىسىن قۇتقارىپ، قايسىسىنىڭ كوزىن قۇرتۋدى بىلمەدى. كۇشتىسى ءالسىزىن تارپا باس سالعان سوڭ عانا سۇلكىنى ءتۇسىپ شوپتەسىنگە وتىرا كەتتى. «مەيىرىمدى پەرىشتە ەمەسپىن» دەدى وزىنە. ونىڭ ۇستىنە، عالامدى جاراتۋشىدان كۇمانداندى. ون سەگىز مىڭ عالامنىڭ ءامىرشىسى بولا تۇرىپ، جان يەلەرىن نەگە قىرقىستىرىپ قويعان دەگەن ويعا بەرىلدى.
ول ورماندى كەزىپ، ءوز-وزىنە كۇبىرلەپ سويلەگەندە ارۋاققا ۇقسادى.
ءبىر كۇنى ول بالالاردىڭ ينەسىنەن ايرىلعان بال ارانى بۇتاقپەن شۇقىلاپ تۇرعانىن كوردى. ارانىڭ دەنەسى شاڭ-توزاڭعا كومىلگەن. قالجىراعان ارا زورعا قوزعالادى. ول بالا شاعىندا ناعاشى اجەسىنەن ارا ينەسىنەن ايرىلعاندا، ارا ۇيىرىنەن قۋالاندى بولاتىنىن، سوڭىندا جالعىز-جارىم ءجۇرىپ ولەتىنىن ەستىگەن ەدى. ارا وڭعا قاراي قوزعالسا، بالالار ونى سولعا قاراي تارتادى. ارا باتىسقا ورمەلەسە، بالالار شىعىسقا قاراي جۇلقىلايدى. ول جاقىنداپ بارىپ ارانى تابانىمەن تاپتاي سالىپ، مەڭىرەيگەن بەتى اسپانعا قارادى…
سودان باستاپ ورمانعا بارمايتىن بولدى.
اۋدارعان - قۋات جۇماش ۇلى
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.