نۇريلا قىزىقان قىزى
جارالمىشى مەندەگى دارالىقتىڭ،
قاسيەتى شىعار-اۋ دالالىقتىڭ.
كوشىپ-قونعان تۇرمىستىڭ وبەگىندە،
ۇشتالىپتى قاناتى بالالىقتىڭ.
جىلقى باقتىق،سيىر دا،قوي دا باقتىق،
كوك ماسادا ءشوپ جيناپ،ويدا جاتتىق.
مالشى بالا اتانعان كەزىمىزدە،
باقىتسىزبىن دەگەندى ويلاماپتىق.
وندا ەلىكتەپ ەڭبەكشى ۇلكەندەرگە،
باراتىنبىز نەلەر ءبىر كىلتەڭ جەرگە.
اعالارعا تاڭدانىپ قارايتىنبىز،
شالعىلارى قۇلاشتاپ سىلتەنگەندە.
بۇلشىق ەتى بۇلتىلداپ بىلەم-بىلەم،
ازاماتقا بىتەتىن كۇرەڭ ءبىر ءوڭ.
قاشان سونداي بولام دەپ اسىعۋشى ەم،
ۇقپايتىنبىز دەگەندى رەڭ،گريم.
بالا تالاپ،بويداعى بالا قايرات،
نەگە ۇرىنىپ جاتقانعا قارامايدى-اق!
ۇلكەنىنە وگىزدىڭ تالاسۋشى ەم،
وزۋ ءۇشىن ۇلداردان شانا ايداپ.
باستىق ماقتاپ «جۇمىسقا جارادىڭ» دەپ،
جۇكتەيتۇعىن بالاعا «بالا مىندەت».
تومەن تۇرمىس مويىندى بۇرعىزبايتىن،
سۇلۋلىققا تۇرسام دا قاراعىم كەپ.
ءومىر سوندا تىرلىكتەن جىر ۇقتىرىپ،
اساۋ باسقا تۇرىپتى قۇرىقتى ءىلىپ،
ايەلدەرگە قىزىعىپ قارايتىنبىز،
سيىرلاردى ساۋعاندا گۇرپ-گۇرپ!
سىرماق تىگىپ،ءجۇن ساباپ،ۇرشىق الىپ،
ءجىپ ءيىرىپ،سۋ اكەپ،كۇل شىعارىپ
ءۇي ۇستاۋ دا سولارشا ءبىلىم سىندى،
ۇيرەت دەۋشى ەك جەڭگەنىڭ تىنشىن الىپ.
اجەلەردىڭ سوزىنە قۇلاق ءتۇرىپ،
جوقتى-باردى سۇراۋشى ەك سۇراق قىلىپ.
جۇمساي قالسا كەتۋشى ەك زىر جۇگىرىپ،
بىردەمەگە وكپەلەپ جىلاپ تۇرىپ.
تاۋلىقتىڭ بار ءوز ءسانى،ءوز دۋمانى،
ابىزى دا بار ەدى ءسوز قۋعانى.
قۋ جاڭقادان مازداعان وت باسىندا
تالاي ءماندى كەشتەردى وزدىرادى.
باتىر جىرىن بەبەۋلەپ كۇي شاناعى،
كوپ ايتاتىن ۇلكەندەر قيسالاردى.
سوندا بەينە الپامىس،قوبىلاندىداي،
باتىر بولۋ تورلايتىن مي-سانانى.
قىلىش سەرمەپ،بۇركەتىن قورعاسىن وق،
مايدانگەرگە ءتانتى بوپ ولجاسى كوپ.
شىقسام دەۋشى ەم بالا ويمەن ەرجەتكەندە،
«ساپ-سارالا شەنى بار قولباسى بوپ».
ءسابي ويمەن شاراسى كىشكەنە تىم،
وياۋ جاتىپ سونداي ءبىر تۇسكە ەنەتىن،
كەزدەرىم دە ەكەن عوي دالا رۋحى
نۇرداي ءسىڭىپ بويىما كۇش بەرەتىن.
كىشكەنتايدان گۋىلدەپ كورىك كەۋدەم،
ساقتاعانداي سابىن بوپ كوبىكتەۋدەن.
مىنە،سولاي،جۇعىپتى ورلىك مىنەز،
تاۋدا تۋىپ،تاۋلىققا ەلىكتەۋدەن.
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.